भरतपुर । माइती नेपाल चितवनले सवारी चालकहरुसँग अन्तर्क्रियागरेको छ । महिला तथा बालबालिकाहरुलाई सुरक्षित यात्रा र सुरक्षित जीवनका लागि सडक सुरक्षा पनि अपरिहार्य छ ।
भरतपुरका चल्ने सार्वजनिक सवारी चालकहरुसँग मानव बेचबिखन, ओसारपसार तथा बाल यौन शोषण नियन्त्रणका लागि अन्तर्क्रिया गरिएको हो ।
माइती नेपाल चितवनका प्रमुख ईश्वर गिरीले यात्राका क्रममा सवारी चालकहरुले पनि शङ्कास्पद गतिविधि भएको महसुस गरेमा सम्बन्धित निकायमा सम्पर्क गरेमा बेचबिखन, ओसारपसार तथा बाल यौन शोषण न्यूनीकरणमा सहयोग पुग्ने बताए ।
‘चिल्ला सडक हुँदैमा सडक सुरक्षा हुँदैन, सडक सुरक्षा हुनका लागि हरेक महिला र बालबालिकाले सुरक्षित यात्रा गर्न पाउनुपर्छ’, उनले भने, ‘यातायातको क्षेत्रमा काम गर्ने साथीहरुले यात्रुलाई गन्तव्यसम्म पुर्याउनुमात्रै जिम्मेवारी होइन, हरेक नागरिकको सुरक्षामाथि पनि ख्याल गर्नुपर्छ ।’
यात्रुको रुपमा सवारीसाधन प्रयोग गर्नेहरुले फरक खालको सङ्केत गरेमा प्रहरीसम्म खबर पुर्याउने काम गर्न सके समाजमा हुँदै आएको मानव बेचबिखन तथा ओसारपसारजस्ता नकारात्मक गतिविधि कम गराउन सकिने गिरीले बताए । सामाजिक सञ्जालको गलत प्रयोगका कारण सवारी चालक र यात्रु दुवै विभिन्न खालको जोखिममा पर्ने गरेको हुँदा सामाजिक सञ्जाललाई पनि कसरी चलाउने भन्ने विषयमा सचेत हुनुपर्ने उनको भनाइ छ ।
नेपाल यातायात स्वतन्त्र मजदुर सङ्गठन चितवनका अध्यक्ष दीपककुमार सिलवालले सवारी चालकहरुसँग अपरिचित महिलाहरुले पनि सम्पर्क बढाउने प्रयास गर्ने घटनाहरु हुँदै आएको हुँदा त्यस्तो अवस्थामा आफैँ सचेत हुन आवश्यक रहेको बताए । क्षणभरको रहरले कतिले अनाहकमा जीवन बर्बाद पारेको हुँदा बदलिँदो समाजका चालकहरुले आफूलाई पनि सुरक्षित र संयमित बनाउन सक्नुपर्ने उनले बताए ।
राज्यले पनि कानुनलाई पूर्णतया कार्यान्वयन नगरेको हुँदा समाजमा विकृतिजन्य घटना हुने क्रम नरोकिएको उनले बताए । कानुनअनुसार गलत गर्नेलाई दण्ड सजायको व्यवस्थालाई कार्यान्वयन गर्ने हो भने कुनै पनि महिला या पुरूष पीडित र पीडक बन्नै नपर्ने उनको बुझाइ छ ।
सवारी चालक दलबहादुर शाहीले महिलाका लागि कानुन बलियो बन्दा पनि आपराधिक घटना भइरहनुले पूर्णरुपमा कानुन कार्यान्वयन भएको छ कि छैन भन्ने प्रस्ट पारेको बताए । कतिपय अवस्थामा महिलाले बोलिदिएकै भरमा सवारी चालक (पुरूष)हरु फन्दामा परेको पनि उनले सुनाए ।
‘अञ्जान महिलाले एक बचन मीठो बोलेकै भरमा मक्ख पर्दा कारागारसम्म पुगेको घटना ताजै छ’, उनले भने, ‘त्यसकारण एक जना अपरिचित व्यक्तिले विभिन्न खालको प्रलोभन देखाएकै भरमा घरपरिवार, आफन्त, इष्टमित्र बिर्सने काम कसैले पनि गर्न हुँदैन ।’
माइती नेपालले मानव बेचबिखन तथा ओसारपसारसँगै यौन हिंसामा परेका व्यक्तिहरुको उद्धार र व्यवस्थापनका लागि लामो समयदेखि काम गर्दै आएको छ । त्यसका लागि सम्भावित जोखिमयुक्त क्षेत्रको पहिचान गरी अन्तर्क्रिया, सचेतना तथा अभिमुखीकरणजस्ता कार्यक्रम आयोजना गर्दै आइरहेको छ ।
