काठमाण्डौ – फेवातालसहित पोखराका विभिन्न तालमा हुने गरेका जलपर्यटन सम्बन्धी गतिविधिलाई कानुनअनुसार व्यवस्थित गरी सुरक्षित ढङ्गले सञ्चालन गर्न जिल्ला प्रशासन कार्यालय, कास्कीले सार्वजनिक रूपमा आग्रह गरेको छ ।
कार्यालयले विज्ञप्तिमार्फत डुङ्गा, कायाकिङ र सर्फिङ बोटलाई सम्बन्धित निकायमा दर्ता गरेर मात्र सञ्चालन गर्न भनेको छ । विभिन्न १५ वटा बुँदामा डुङ्गा, कायाकिङ र सर्फिङ बोटसम्बन्धी सावधानी अपनाउनुपर्ने विषय समेटिएको छ ।
लाइफ ज्याकेट बिना त्यस्ता गतिविधिमा भाग लिन पूर्ण रूपमा रोक लगाएको सहायक प्रमुख जिल्ला अधिकारी रमेश घर्तीले निकालेको विज्ञप्तिमा उल्लेख छ ।
व्यवसायीले सेवाग्राही के–कस्तो अवस्थामा जलपर्यटसँगसम्बन्धी गतिविधिमा भाग लिएका छन् भनेर नियमित निगरानी गर्नुपर्नेछ । १६ वर्षमुनिका बालबालिकालाई अभिभावकबिना एक्लै कायाकिङ र सर्फिङ बोट सञ्चालन गर्न नदिन प्रशासनको आग्रह छ ।
त्यस्तै तोकिएको ठाउँमा मात्र कायाकिङ र सर्फिङ बोट सञ्चालन गर्न अनुरोध गरिएको छ । पूर्वस्वीकृति लिएकोभन्दा धेरैको संख्यामा कायाकिङ र सर्फिङ बोट सञ्चालन नगर्न भनिएको छ ।
पर्यावरणीय स्वच्छता र सुन्दरतामा आँच नआउने गरी जलपर्यटन गतिविधि सञ्चालन गर्न अनुरोध गरिएको छ । हावाहुरी, वर्षा र चट्याङजस्ता अवस्थामा डुङ्गा, कायाकिङ र सर्फिङ बोट सञ्चालन नगर्न विज्ञप्तिमार्फत सचेत गराइएको छ ।
सूचनालाई अटेर गरी गतिविधि सञ्चालन गरेको पाइएमा कानुनबमोजिम कारबाही हुने कार्यालयले चेतावनी दिएको छ ।
