रत्ननगर । पर्वत चितवन समाज रत्ननगरले नेपालीहरूको महान् पर्व विजयादशमी, शुभ दीपावली, नेपाल संवत् तथा छठ पर्वको अवसर पारेर शुभकामना आदान–प्रदान तथा सम्मान कार्यक्रम सम्पन्न गरेको छ।
२०८३ असोज २५ गते रत्ननगर नगरपालिका–१ स्थित दुर्गा मन्दिरको सभाहलमा आयोजित कार्यक्रम समाजका अध्यक्ष विष्णु प्रसाद अधिकारीको अध्यक्षतामा सम्पन्न भएको हो। कार्यक्रममा समाजका सचिव नरहरि पुरीले सहजीकरण गरेका थिए भने उपाध्यक्ष तुलसी गिरीले स्वागत मन्तव्य राखेका थिए। कार्यक्रममा सहभागीहरूले एकापसमा चाडपर्वको शुभकामना साटासाट गर्दै आपसी सद्भाव, एकता र भाइचाराको सन्देश आदान–प्रदान गरेका थिए।
कार्यक्रमका अवसरमा विभिन्न पदमा निर्वाचित समाजका सदस्यहरूलाई सम्मान गरिएको थियो। समाजका अग्रज तथा सल्लाहकार समिति संयोजक डम्बर पुरीले नेपाली कांग्रेसको हालै सम्पन्न राष्ट्रिय महाधिवेशनबाट नगर सभापतिमा निर्वाचित उमेश गिरी, बागमती प्रदेश प्रतिनिधिमा निर्वाचित कुलप्रसाद सापकोटा तथा वडा सभापतिमा निर्वाचित विष्णु प्रसाद अधिकारीलाई खादा ओढाएर सम्मान गरेका हुन्। उनले नवनिर्वाचित पदाधिकारी तथा प्रतिनिधिहरूलाई सफल कार्यकालको शुभकामना पनि व्यक्त गरे।
कार्यक्रममा रत्ननगर नगरपालिका–५ का वडाध्यक्ष बालकृष्ण चापागाईं, भक्ति भजन समूहका अध्यक्ष गोविन्द शर्मा, रत्ननगर–१० का खानेपानी वडा संयोजक खगनाथ पराजुलीलगायत समाजका सदस्यहरूको सहभागिता रहेको थियो।
