इरानसँगको युद्ध अन्त्य गर्ने सहमति अन्तिम चरणमा पुगेको ट्रम्पको दाबी
काठमाण्डौ – अमेरिकी राष्ट्रपति डोनाल्ड ट्रम्पले इरानसँगको युद्ध अन्त्य गर्ने सहमति अन्तिम चरणमा पुगेको दाबी गर्नुभएको छ ।
उहाँले इरानमाथि गर्ने भनिएको थप सैन्य आक्रमण पनि रोकिएको बताउनुभएको छ । ह्वाइट हाउसमा सञ्चारकर्मीसँग कुराकानी गर्दै ट्रम्पले सहमतिका लागि इरानले आणविक हतियार निर्माण नगर्ने सुनिश्चितता गर्नुपर्ने समेत दोहोर्याउनु भएको बीबीसीले जनाएको छ । सहमति सम्बन्धी दस्ताबेजहरू लगभग अन्तिम चरणमा रहेका र छिट्टै औपचारिक हस्ताक्षर हुन सक्ने सम्भावना रहेको ट्रम्पको भनाइ छ ।
यो सहमति भएपछि विश्वकै महत्त्वपूर्ण पेट्रोलियम ढुवानी मार्ग मानिने हर्मुज जलमार्ग पूर्ण रूपमा सञ्चालनमा आउने समेत उहाँले बताउनुभयो । तर इरानले भने ट्रम्पको दाबीलाई तत्काल स्वीकार गरेको छैन । इरानी परराष्ट्र मन्त्रालयका प्रवक्ता इस्माइल बघाइले अहिलेसम्म कुनै अन्तिम सहमति नभएको बताउनुभएको छ । उहाँले अमेरिकाले वार्ताका क्रममा थप नयाँ तथा अत्यधिक मागहरू अघि सारेको आरोप समेत लगाउनु भएको छ ।
ट्रम्पको सम्भावित सहमतिसम्बन्धी घोषणापछि अन्तर्राष्ट्रिय बजारमा कच्चा तेलको मूल्य झण्डै ४.४ प्रतिशतले घटेर प्रतिव्यारेल ८९ अमेरिकी डलरमा झरेको अन्तर्राष्ट्रिय सञ्चारमाध्यमले जनाएका छन् । यसले ऊर्जा आपूर्ति सहज हुने सङ्केत गरेको छ । यसैबीच राष्ट्रसंघले मध्यपूर्वमा बढ्दो तनावप्रति गहिरो चिन्ता व्यक्त गर्दै सबै पक्षलाई युद्धविरामको पूर्ण पालना गर्न तथा थप तनाव नबढाउन आग्रह गरेका छन् ।
