यस वर्षको फिफा विश्वकपमा रातारात चर्चामा आएका केप भर्डेका गोलकिपर भोजिन्हाले आफ्नो गोपनीयता गुमेको र मौका पाएमा पहिलेको जस्तो जीवनमै फर्कन चाहने बताएका छन् ।
विश्वकपअघि ४० वर्षीय भोजिन्हा खासै परिचित थिएनन् तर केप भर्डेको पहिलो खेलमा उत्कृष्ट प्रदर्शन गर्दै उनले अन्तर्राष्ट्रियस्तरमा ख्याति कमाए । स्पेनसँगको खेल गोलरहित बराबरीमा टुङ्गिएको थियो । यो खेलमा उनले प्रतियोगिताको उपाधि विजेता बन्न सफल स्पेनका खेलाडीहरूले गरेको प्रहारलाई रोक्दै लगातार उत्कृष्ट बचाउ गरेका थिए ।
यो खेलपछि इन्स्टाग्राममा भोजिन्हाका फलोअर्सको सङ्ख्या झन्डै ५० हजारबाट बढेर २ करोड ८४ लाख पुगेको छ । साथै उनी पोर्चुगलको साना क्लब ‘चाभेस’ बाट चिलीको शीर्ष डिभिजनको क्लब ‘कोलो–कोलो’ मा आबद्ध भएका छन् । उनले विभिन्न सम्मानहरू पनि प्राप्त गरेका छन्—जसमा ‘बालोन डी’ओर’ अन्तर्गत वर्षको उत्कृष्ट पुरुष गोलकिपरको सूचीमा पर्नु र समुद्री मोलस्कको एउटा नयाँ प्रजातिलाई उनको नाम दिइनु समावेश छन् ।
तर भोजिन्हा आफ्नो नयाँ–नयाँ चर्चाले ठूलो मूल्य चुकाउनुपर्ने अवस्था पनि ल्याएको बताउँछन् । ‘मैले मेरो शान्ति र चैन गुमाएको छु’, उनले ‘द अब्जर्भर’ पत्रिकासँग भने ।
भोजिन्हाले आफ्नो लोकप्रियताले आमाबुबालाई पनि असर पारेको गुनासो गरेका छन् । यही कारण सीमाहरू तोक्न सिक्नुपर्ने अवस्था आएको उनको भनाइ छ ।
‘धेरै मानिसहरू प्रसिद्ध हुन र सार्वजनिक रूपमा चिनिन चाहन्छन् तर उनीहरूले त्यस यथार्थको सकारात्मक पक्षमात्र देख्छन् । साँचो भन्नुपर्दा, यदि मलाई मेरो अहिलेको जीवन र पहिलेको जीवनमध्ये कुनै एक रोज्ने अवसर दिइयो भने म पहिलेकै जीवन रोज्ने थिएँ’, भोजिन्हाले भने ।
विश्वकपमा छनोट हुने जनसङ्ख्याका आधारमा दोस्रो सबैभन्दा सानो देश केप भर्डेले स्पेनलाई बराबरीमा रोकेपछि उरुग्वे र साउदी अरेबियासँग पनि बराबरी खेल्दै नकआउट चरणमा पुगेको थियो । तर साविक विजेता तथा अन्ततः उपविजेता बनेको अर्जेन्टिनासँगको खेल अतिरिक्त समयसम्म पुगे पनि केप भर्डे ‘राउन्ड अफ ३२’ बाट बाहिरिएको थियो ।
