राष्ट्रिय स्वतन्त्र पार्टी (रास्वपा)का सांसद कृष्णकुमार कार्कीले विदेशी महिलासँगको सम्बन्धबारे आफूलाई केही थाहा नभएको बताएका छन् । मंगलबार संसद सचिवालय भवनबाट बाहिरिने क्रममा पत्रकारसँग संक्षिप्त प्रतिक्रिया दिँदै उनले आफू यस विषयमा अनभिज्ञ रहेको जनाए ।
पत्रकारले सोधेको पहिलो प्रश्नमा उनले कोट र टिसर्टसमेत खोलेर ट्याटू नभएको देखाउँदै प्रश्न पन्छाउन खोजेको देखिन्छ । त्यसपछि केही पत्रकारले लगातार प्रश्न गरे पनि उनले आफ्नो ट्याटू नभएको र पत्रकारहरूले झुटो आरोप लगाएको दाबी दोहोर्याए ।
विदेशी महिलालाई गाडी सिकाएको तथा उनीसँगको सम्बन्धबारे पुनः प्रश्न उठेपछि कार्कीले ‘छानबिन होला, त्यसपछि बोलौँला’ भन्दै प्रतिक्रिया दिए र बाइक चढेर सिंहदरबारबाट बाहिरिएका थिए ।
त्यसअघि संसदमा सभामुखले बोलाउँदा आफू किन नबोलेको भन्ने विषयमा पनि उनले स्पष्टीकरण दिएका थिए । शून्य समयमा हस्ताक्षर नगरेकाले आफू संसदमा उपस्थित भए पनि बोल्न नपाएको उनको भनाइ थियो ।
आजकै संसद बैठकमा उनकाे चरित्रबारे प्रश्न उठेकाे थियाे । आजकाे संसद बैठकमा नेकपाकी सांसद पार्वती बिक र कांग्रेसकी सांसद निनुकुमारी कर्णले उनीमाथि छानबिन गर्न माग गरेका छन् ।
