नवयुवा रोजगारी माग्न आउँछन्, आश्वासनबाहेक केही दिन सकेनौँ : मन्त्री यादव
काठमाण्डाै – श्रम, रोजगार तथा सामाजिक सुरक्षामन्त्री रामजी यादवले नवयुवालाई सरकारले रोजगारी दिन नसकेको बताउनुभएको छ ।
उद्योग तथा वाणिज्य र श्रम तथा उपभोक्ता हित समितिको आजकाे बैठकमा उहाँले नवयुवा आन्दोलनमा घाइते भएका युवाहरू रोजगारीको माग लिएर मन्त्रालयमा लगातार आउने गरेको भए पनि आश्वासन दिएर मात्रै पठाउने काम भएको बताउनुभएको हो ।
मन्त्री यादवका अनुसार मन्त्रालयमा दैनिक हजारभन्दा धेरै युवा रोजगारी माग्न आउने गरेका छन् । उहाँले आउँदाे आर्थिक वर्षको बजेटमा घाइतेहरूलाई सीपमूलक तालिम दिने योजना राखिएको भए पनि रोजगारीको ग्यारेन्टी गर्न नसकिने बताउनुभयो ।
उहाँले भन्नुभयाे, ‘मन्त्रालयमा रोजगार नाम जोडिएकोले नवयुवा रोजगारी माग्न आउनुहुन्छ । २–३ दिनमा ३ हजार हाराहारीमा हामीलाई रोजगार चाहियो भन्दै आउनुभएकाे छ । अब हामीले रोजगार कसरी दिने ? हामीले सीप दिएर रोजगारीका लागि जाेडिदिने हाे । आश्वासनबाहेक हामीले केही पनि गर्न सकेनौँ । आन्तरिक रोजगारमा समस्या छ ।’
यादवका अनुसार राष्ट्रिय रोजगार कार्यक्रमको बजेटमा भारी कटौती भएको छ । पहिले १३ अर्ब रुपैयाँकाे बजेट अहिले घटेर १ अर्ब २० करोडमा सीमित भएको उहाँको गुनासो छ । देशभर अधिकतम १७ हजार जनालाई मात्रै १०० दिनको रोजगारी दिन सकिने उहाँकाे भनाइ छ ।
मन्त्री यादवले सीपमूलक तालिम आयोजना गरेर निजी क्षेत्रसँग रोजगारीका लागी समन्वय गर्ने गरी काम अगाडि बढाएको उल्लेख गर्नुभयाे ।
