काठमाडौंः काठमाडौंमा अतिक्रमित संरचना भत्काउनेक्रम आज पनि जारी छ। हिजो बल्खु, टेकु वंशीघाट, शंखमुललगायतका क्षेत्रमा ७४४ घरटहरा भत्काइएका थिए।
त्यसमध्ये हिजो साँझसम्म ३२३ परिवार सरकारको सम्पर्कमा आएका छन्। ती परिवारका एक हजार ४१४ जनामध्ये ८० जनालाई हिजै खरिपाटीमा व्यवस्थापन गरिएको छ। त्योक्रम आजपनि जारी राखिएको हो। बिहानैदेखि रुद्रमति, घट्टेकुलो आसपासका क्षेत्रमा डोजर चल्न सुरु भइसकेको छ। वडा नं १५ मा रहेको स्वयंभू क्षेत्र र वडा नं १६ मा रहेको बालाजु क्षेत्रमा पनि आजै डोजर चलाइने काठमाडौं महानगरपालिकाका प्रवक्ता नवीन मानन्धरले जानकारी दिए।
उनकाअनुसार ती क्षेत्रमा ६०० भन्दा बढी संरचना आज भत्काइनेछन्। हरेक दिनझैं सैयौँको संख्यामा सुरक्षाकर्मीको तैथानी बढाइएको छ। हिजो शंखमुल क्षेत्रमा केही लालपूर्जा भएकै घरमासमेत डोजर चलाइएपछि स्थानीयहरु थप आतंकित बनेका छन्। सुकुमवासीको पहिचान नहुँदा नदी किनारका जोसुकैको घरहरु भत्काउन थालेपछि नागरिक आतंकित बनेका हुन्।
नदी किनारमा घर भएकाहरुले आफ्नो घरमा जग्गाधनी पुर्जा टाँसेर बसेका छन्। धोबीखोला क्षेत्रमा लालपूर्जामै घर बनाएर बसेका वासिन्दाले पनि आफ्ना घरका भित्तामा जग्गाधनी प्रमाणपत्र टाँसेका छन्। अहिले धोबीखोलाको रुद्रमती मन्दिरनजिकको क्षेत्रमा डोजर चलेको छ। त्यहाँका वासिन्दाहरुलाई स्क्रिनिङका लागि दशरथ रंगशालामा लगिनेछ। वास्तविक सुकुम्वासीहरुलाई सकरारले निर्माण गरेका सेल्टरहरुमा राखिने मानन्धरले जानकारी दिए।
