सामाजिक सञ्जालले लोकतन्त्रलाई हानि पुर्याउँछ भन्ने मानिसहरूको सङ्ख्या बढ्दै गइरहेको एक सर्वेक्षणले देखाएको छ ।
विश्वभर बढ्दो चिन्ता र कडा निगरानीका बीच सामाजिक सञ्जालले मानिसहरूलाई प्रभावित पार्ने, विभाजित गर्ने र लोकतन्त्रलाई हानि पुर्याउने ठान्नेहरूको सङ्ख्या बढ्दै गएको ‘प्यु रिसर्च सेन्टर’ ले जनाएको छ ।
मेटा, स्न्याप र टिकटकलगायत लोकप्रिय सामाजिक प्लेटफर्महरू सञ्चालन गर्ने कम्पनीहरूले हजारौँ मुद्दाहरूको सामना गरेका र प्रयोगकर्ताहरूलाई हानि पुर्याएको आरोपसम्बन्धी दाबीहरू सुल्झाउन ठूलो रकम भुक्तानी गरेका समाचार संस्था रोयटर्सले जनाएको छ ।
यसैबीच सरकारहरूले आफ्ना नागरिकको गोपनीयताको रक्षा गर्ने त्रुटिरहित उपायहरू खोजेका छन् ।
प्रतिवेदनअनुसार धेरैजसो उत्तरदाताले सामाजिक सञ्जालले मानिसहरूलाई जानकारी दिने र राजनीतिमा उनीहरूलाई आफ्ना कुरा राख्ने अवसर प्रदान गर्ने बताएका छन् । यद्यपि सन् २०२२ को तुलनामा अहिले सामाजिक सञ्जाललाई ‘नराम्रो कुरा’ मान्नेहरूको सङ्ख्यामा भने व्यापक वृद्धि देखिएको छ ।
अमेरिका, क्यानडा र बेलायतजस्ता धनी देशका मानिसहरूमा सामाजिक सञ्जालले लोकतन्त्रलाई हानि पुर्याइरहेको छ भन्ने धारणा राख्ने प्रवृत्ति, घाना, केन्या र नाइजेरियाजस्ता प्रतिव्यक्ति कुल गार्हस्थ्य उत्पादन (जीडीपी) कम भएका अर्थतन्त्रका मानिसहरूको तुलनामा धेरै पाइएको छ ।
प्यु रिसर्चले ३७ देशका ४५ हजारभन्दा धेरै मानिसमाझ सर्वेक्षण गरेको तथा अमेरिकीमाझ सामाजिक सञ्जालको प्रयोगबारे थप ५ हजार ५११ जना वयस्कसँग सर्वेक्षण गरेको जनाएको छ ।
