काठमाण्डौ – नेपाली कांग्रेसको १५औँ महाधिवेशन आजदेखि काठमाण्डौमा शुरु हुँदैछ ।
महाधिवेशन उद्घाटन समारोह खुलामञ्चमा दिउँसो २ बजे हुनेछ । महाधिवेशनका लागि देशभरबाट ७ हजार भन्दा धेरै महाधिवेशन प्रतिनिधि सहभागी हुँदैछन् ।
महाधिवेशन प्रतिनिधिको रजिस्ट्रेसन शुल्क ३ हजार ५ सय रुपैयाँ तोकिएको छ । महाधिवेशनमा विदेशी प्रतिनिधिहरुलाई पनि आमन्त्रण गरिएको छ । उद्घाटन समारोहपछि महाधिवेशनको बन्दसत्र तथा अन्य कार्यक्रम भोलि र पर्सि हुनेछन् । त्यसपछि असोज २१ र २२ गते नेतृत्व चयनका लागि चुनावी कार्यक्रम राखिएको छ ।
१५औँ महाधिवेशनको मुख्य आकर्षण कांग्रेसको नयाँ केन्द्रीय नेतृत्व चयन हो । गएको पुसमा भएको विशेष महाधिवेशनबाट गगन थापा सभापति बनेपछि कांग्रेसले नियमित महाधिवेशन गर्न लागेको हो । महाधिवेशनमा सभापति, उपसभापति, महामन्त्री, सहमहामन्त्रीलगायत पदाधिकारीसँगै केन्द्रीय सदस्यका लागि प्रतिस्पर्धा हुनेछ ।
सहमहामन्त्रीका ११ पदमा पनि विभिन्न नेताहरूले दाबी प्रस्तुत गर्न थालेका छन् । महाधिवेशनले २४० सदस्यीय केन्द्रीय कार्यसमिति चयन गर्ने व्यवस्था गरिएको छ । विधानअनुसार १७१ जना पदाधिकारी तथा केन्द्रीय सदस्य निर्वाचनबाट आउने र बाँकी ६१ जना केन्द्रीय सदस्य सभापतिले मनोनयन गर्ने व्यवस्था रहेको छ ।
विधान संशोधनमार्फत ३५ वर्षमुनिका युवाको केन्द्रीय प्रतिनिधित्व सुनिश्चित गर्ने विषयसमेत अघि सारिएको छ । १५औँ महाधिवेशन कांग्रेसभित्रको आन्तरिक विवादका बीच हुन लागेको हो ।
पूर्वसभापति शेरबहादुर देउवा नेतृत्वको समूहले विशेष महाधिवेशनबाट भएको नेतृत्व परिवर्तन र त्यससँग जोडिएका निर्णयमाथि असहमति जनाउँदै कानुनी प्रक्रियासमेत अघि बढाएको थियो । तर नियमित महाधिवेशनको प्रक्रिया अघि बढिसकेको अवस्थामा देउवा समूहले पनि आफ्नो संगठनात्मक तयारीलाई तीव्रता दिएको छ ।
महाधिवेशनका लागि कांग्रेसले झण्डै ७ लाख ८३ हजार ८ सय ३६ क्रियाशील सदस्य कायम गरेको विवरण सार्वजनिक भएको छ । महाधिवेशन अवधिभर प्रतिनिधिका लागि भृकुटीमण्डपमा बिहान र दिउँसोको खाना उपलब्ध गराउने व्यवस्था पनि गरिएको छ ।
