क्यासिनोमा नेपाली नागरिकलाई प्रवेश गराएर जुवा खेलाइएको आरोपमा पर्सा प्रहरीले सखुवाप्रसौनी गाउँपालिकाका अध्यक्षदेखि प्रहरी निरीक्षकसम्मलाई पक्राउ गरेको छ ।
जिल्ला प्रहरी कार्यालय पर्साका प्रमुख एवं प्रहरी उपरीक्षक (एसपी) पवन कुमार भट्टराई आफैं पुगेर क्यासिनोमा छापा मारेका हुन् ।
पर्सा प्रहरीका अनुसार पक्राउ पर्नेमा गाउँपालिका अध्यक्ष जसवन्त यादव, प्रहरी निरीक्षक प्रदीप पौडेल, वीरगञ्ज महानगरपालिका–११ का ३० वर्षीय चन्दन सहनी, सोही वडाका ३९ वर्षीय ओमप्रकाश बैठा पक्राउ परेका हुन् ।
वीरगञ्ज महानगरपालिका–१४ का २८ वर्षीय विजयकुमार पटेल, वीरगञ्ज–२५ का ३१ वर्षीय दिनेशकुमार पटेल, महोत्तरीको पिपरा गाउँपालिका–५ का ४९ वर्षीय जयदेव साह र वीरगञ्ज–१२ का ५० वर्षीय प्रदेशी साह पनि पक्राउ परेका छन् ।
पौडेल इलाका प्रहरी कार्यालय पोखरीयाका इन्सपेक्टर हुन् । वीरगञ्ज महानगरपालिका–१४ गण्डकस्थित गोल्डेन फिंगर गेमिङ जोन प्रालि (क्यासिनो)मा नेपाली नागरिक प्रवेश गरी जुवा खेलिरहेको सूचना आएको थियो । सूचना पाएपछि प्रहरी टोली परिचालन गरिएको थियो ।
क्यासिनोमा भेटियो गाउँपालिकाको सरकारी स्कर्पियो
घटनालाई थप गम्भीर बनाउने अर्को तथ्य प्रहरीले क्यासिनो परिसरबाट बरामद गरेको गाउँपालिकाको सरकारी सवारीसाधन हो ।
प्रहरीले सखुवाप्रसौनी गाउँपालिकाको ना १ झ १६८७ नम्बरको स्कर्पियो क्यासिनो परिसरबाट नियन्त्रणमा लिएको जनाएको छ ।
सरकारी प्रयोजनका लागि प्रयोग हुने गाउँपालिकाको सवारी क्यासिनो परिसरमा भेटिएपछि प्रहरीले त्यसलाई समेत अनुसन्धानको दायरामा ल्याएको हो । घटनामा पक्राउ परेका गाउँपालिका अध्यक्ष यादव क्यासिनोमा रहेको समयमा उक्त सरकारी गाडी त्यहाँ पुगेको देखिएको प्रहरीको भनाइ छ ।
प्रहरीले घटनालाई केवल क्यासिनोमा जुवा खेलिरहेको अवस्थाको नियन्त्रणका रूपमा मात्र सीमित नगरी थप प्रमाण संकलन थालेको छ ।
जिल्ला प्रहरी कार्यालय पर्साले क्यासिनोबाट हार्ड डिक्स, विभिन्न कागजात, कम्प्युटर तथा सीसीटीभीको डीभीआर बक्स नियन्त्रणमा लिएको जनाएको छ ।
क्यासिनोभित्र नेपाली नागरिकलाई कसरी प्रवेश गराइएको थियो, उनीहरूलाई कसले जुवा खेल्न सहजीकरण गरेको थियो र घटनामा पक्राउ परेका व्यक्तिहरूको भूमिका के थियो भन्ने विषयमा प्रहरीले थप अनुसन्धान गरिरहेको छ ।
प्रहरीले नेपाली नागरिकलाई क्यासिनोमा प्रवेश गराउनु तथा जुवा खेलाउनु गैरकानूनी कार्य भएको भन्दै घटनामा संलग्न व्यक्तिलाई नियन्त्रणमा लिएर अनुसन्धान अघि बढाएको जनाएको छ ।
प्रहरी निरीक्षक आफैं क्यासिनो पुगेको प्रहरीको दाबी
यो घटनामा प्रहरी निरीक्षक प्रदीप पौडेलको पक्राउले पनि विषयलाई थप चर्चामा ल्याएको छ । एसपी भट्टराईले पौडेल पक्राउ परेको पुष्टि गरेका छन् । उनका अनुसार पौडेलले २०८२ फागुन २१ गते सम्पन्न प्रतिनिधिसभा सदस्य निर्वाचनमा उत्कृष्ट काम गरेको भन्दै प्रदेश प्रहरीबाट नगदसहित पुरस्कृत भएका थिए ।
प्रहरीका अनुसार शनिबार राति ड्युटी छाडेर पौडेल गाउँपालिका अध्यक्ष यादव र केही स्थानीय व्यवसायीसहित क्यासिनोमा पुगेका थिए ।
प्रहरीकै संरक्षणमा नेपाली नागरिकलाई निर्वाध रूपमा क्यासिनो प्रवेश गराई जुवा खेलाइएको सूचना पाएपछि एसपी भट्टराई आफैं घटनास्थलमा पुगेको प्रहरीको भनाइ छ ।
प्रहरी निरीक्षक पौडेल गत वर्ष असोजको अन्तिम साता प्रहरी प्रधान कार्यालयको मानवस्रोत विभागबाट वीरगञ्ज गएका थिए ।
