२२ साउन, काठमाडौं ।
रु. २५० को सामान खरिद गरेका एक उपभोक्ताले करदाता प्रोत्साहन उपहार योजनाअन्तर्गत रु. १० लाखको बम्पर उपहार जितेका छन्।
आन्तरिक राजस्व विभागका अनुसार शिव कृष्ण जनरल स्टोरबाट रु. २५० को सामान खरिद गर्ने उपभोक्ताको कुपन नम्बर ००७ ३१५ २५४ ४९३ ले बम्पर पुरस्कार जितेको हो। यस्तै, अन्य १५ जना उपभोक्ताले जनही रु. १ लाखका दरले उपहार जितेका छन्।
विभागले शुक्रबार अर्थ मन्त्रालयमा कार्यक्रम आयोजना गरी साउन महिनाको पहिलो १५ दिनको उपहार योजनाका विजेताको नतिजा सार्वजनिक गरेको हो।
उपभोक्तालाई सामान खरिद गर्दा अनिवार्य रूपमा बिल लिने बानीको विकास गराउने तथा कर प्रणालीलाई थप प्रभावकारी बनाउने उद्देश्यले सरकारले करदाता प्रोत्साहन उपहार योजना सञ्चालनमा ल्याएको हो।
चालु आर्थिक वर्षको बजेटमार्फत घोषणा गरिएको यो कार्यक्रमअन्तर्गत प्रत्येक १५ दिनमा १५ जना उपभोक्तालाई जनही रु. १ लाख र एक जनालाई रु. १० लाखको बम्पर पुरस्कार प्रदान गरिने व्यवस्था गरिएको छ। साउन महिनाको पहिलो १५ दिनका लागि गरिएको यो पहिलो पुरस्कार घोषणा हो।
