काठमाडौँ। काठमाडौँ उपत्यकाका विभिन्न स्थानमा महिला तथा वृद्धवृद्धाहरूलाई त्रसित बनाउँदै श्रृंखलाबद्ध रूपमा सुनका सिक्री लुटपाट गर्ने ‘कर्मा समूह’ का नाइके र सदस्यहरूलाई प्रहरीले पक्राउ गरेको छ।
जिल्ला प्रहरी परिसर काठमाडौँले आइतबार पत्रकार सम्मेलनको आयोजना गरी उक्त कुख्यात गिरोहका नाइके कर्मा तामाङसहित पाँच जनालाई नियन्त्रणमा लिएको जानकारी दिएको हो।
विगत लामो समयदेखि काठमाडौँका सडकहरूमा ‘चेन स्न्याचिङ’ (सिक्री लुटपाट) को आतंक मच्चाउँदै आएको यो समूहले विशेष गरी बिहान र बेलुकाको समयमा एक्लै हिँडिरहेका महिला तथा वृद्धाहरूलाई निशाना बनाउने गरेको थियो।
लुटपाट गर्ने क्रममा प्रतिकार गर्न खोज्ने पीडितहरूलाई घाँटी थिच्ने, कुटपिट गर्ने र घाइते बनाउनेसम्मका निर्दयी गतिविधिमा यो समूह संलग्न रहेको प्रहरी अनुसन्धानबाट खुलेको प्रहरीले जनाएको छ ।
जिल्ला प्रहरी परिसर काठमाडौँका अनुसार समूहका नाइके ३४ वर्षीय कर्मा तामाङलाई पक्राउ गर्न प्रहरीले गोली नै प्रहार गर्नुपरेको थियो। सिन्धुपाल्चोकको मेलम्ची नगरपालिका–४ घर भई बौद्ध बस्ने कर्मालाई पक्राउ गर्न प्रहरी टोलीले लामो समयदेखि निगरानी गरिरहेको थियो। शनिबार राति १०:२५ बजे बुढानिलकण्ठको चुनिखेलस्थित पानी ट्याङ्की नजिक उनी लुकिछिपी बसेको सूचनाका आधारमा प्रहरी टोली त्यहाँ पुगेको थियो।
प्रहरीले नियन्त्रणमा लिन खोज्दा कर्माले आफ्नो साथमा रहेको खुकुरी निकालेर प्रहरी टोलीमाथि नै साङ्घातिक आक्रमणको प्रयास गरेका थिए। प्रहरीले आत्मरक्षाका लागि र चेतावनी स्वरूप सुरुमा दुई राउन्ड हवाई फायर गरेको थियो।
हवाई फायर गर्दा पनि आत्मसमर्पण गर्नुको साटो मोटरसाइकलमा चढेर भाग्न खोजेपछि प्रहरीले उनको घुँडा मुनि एक राउन्ड गोली प्रहार गरी नियन्त्रणमा लिएको हो। घाइते कर्माको हाल राष्ट्रिय ट्रमा सेन्टरमा उपचार भइरहेको छ। कर्मा तामाङ यसअघि पनि पटक–पटक चोरी र डाँका मुद्दामा पक्राउ परेका र प्रहरी वृत्त स्वयम्भूको हिरासतबाट समेत फरार भएका कुख्यात अपराधी हुन्।
यसरी हुन्थ्यो लुटपाटको योजना
यो समूहको काम गर्ने शैली निकै नै योजनाबद्ध र व्यवसायिक देखिएको प्रहरीको भनाइ छ। कर्मा समूहले लुटपाटमा प्रयोग गर्नका लागि सुरुमा २२० सीसीका पल्सर मोटरसाइकलहरू चोरी गर्ने गरेको पाइएको छ। चोरी गरिएका मोटरसाइकलको नम्बर प्लेट तत्कालै परिवर्तन गरी उनीहरू शिकारको खोजीमा निस्कन्थे। बाटोमा हिँडिरहेका महिला वा वृद्धाहरूलाई फेला पारेपछि उनीहरूले ‘फलानो ठाउँ जाने बाटो कता हो?’ भन्दै सोध्ने बहानामा अलमल्याउने र मौका छोपेर घाँटीको सिक्री लुटी फरार हुने गर्दथे।
लुटपाट गरिसकेपछि उनीहरूले पुनः मोटरसाइकलको नम्बर प्लेट र स्वरूप परिवर्तन गर्ने र उक्त मोटरसाइकललाई उपत्यका बाहिर लगेर सस्तो मूल्यमा बिक्री गर्ने गरेका थिए। घटनास्थलबाट प्रहरीले एउटा मोटरसाइकल, एउटा खुकुरी, पाँच थान फरक–फरक नम्बर प्लेट र मोटरसाइकलको लक तोड्न प्रयोग गरिने मास्टर की र टी-लक समेत बरामद गरेको छ।
समूहका अन्य सदस्य र उनीहरूको भूमिका
प्रहरीले कर्माभन्दा एक दिन अगाडि नै साउन १५ गते शुक्रबार काभ्रेको बनेपाबाट समूहका अन्य चार सदस्यलाई पक्राउ गरेको थियो। पक्राउ पर्नेमा ३० वर्षीय प्रतिमान गोले रहेका छन् । उनी सो समूहको मुख्य ‘राइडर’ (चालक) भएको बताइएको छ। प्रतिमान डाँका मुद्दामा नख्खु कारागारमा कैद भुक्तान गरिरहेका बेला भागेका थिए भने पुनः पक्राउ परेर कैद भुक्तान गरी छुटेको तीन हप्तामै फेरि लुटपाटमा सक्रिय भएका हुन्।
त्यस्तै, ३० वर्षीय पासाङ घिसिङ मोटरसाइकल चोरीका विशेषज्ञ मानिन्छन्। उनले काठमाडौँ उपत्यकाभित्र मात्रै २० भन्दा बढी मोटरसाइकल चोरी गरेको प्रहरीसमक्ष स्वीकार गरेका छन्। समूहका अर्का सदस्य २९ वर्षीय आले गुरुङ घटनास्थल वरिपरि सशस्त्र रूपमा ‘स्ट्याण्डबाई’ रहने भूमिकामा थिए, जसको काम लुटपाट गर्दा कसैले प्रतिकार गरेमा बल प्रयोग गर्नु हुन्थ्यो।
यो गिरोहले लुटेका सुनका गहनाहरू ठेगान लगाउने काम भने बनेपा बस्ने सुन पसल सञ्चालक ३६ वर्षीय मनोज तामाङले गर्दै आएका थिए। उनले लुटेर ल्याइएका सुनका गहनाहरूलाई तत्कालै गाल्ने र स्वरूप परिवर्तन गरी बिक्री गर्ने गरेको प्रहरीले जानकारी दियो ।
श्रृंखलाबद्ध घटनाहरूको विवरण
अनुसन्धानका क्रममा यो समूहले छोटो अवधिमै धेरै लुटपाट गरेको तथ्य बाहिर आएको छ। असार १३ गते बिहान शान्तिनगरमा एक व्यक्तिलाई बाटो सोध्ने निहुँमा लछारपछार गरी साढे दुई तोलाको सिक्री लुटिएको थियो। त्यस्तै असार १५ गते नरेफाँटमा तीन तोलाको सिक्री र सोही दिन साँझ बनेपामा दूध लिन जाँदै गरेकी महिलाको साढे एक तोलाको सिक्री यो समूहले लुटेको थियो।
पछिल्लो पटक साउन ७ गते धापासी हाइटमा ६६ वर्षीया वृद्धाको घाँटीबाट एक तोलाको सिक्री लुट्दा पनि यही समूहको संलग्नता देखिएको प्रहरीले जनाएको छ।
जिल्ला प्रहरी परिसर काठमाडौँले यस कर्मा समूहको गिरफ्तारीसँगै उपत्यकामा हुने सिक्री लुटपाटका घटनामा उल्लेख्य कमी आउने विश्वास लिएको छ।
