भरतपुर । जिल्ला प्रहरी कार्यालय भरतपुरको तथ्याङ्कअनुसार चितवन जिल्लामा लागूऔषधसम्बन्धी मुद्दा ४९ प्रतिशतले बढेको छ । अघिल्लो आव ०८१/०८२ मा १ सय ८५ वटा मुद्दा रहेकोमा गत आव ०८२/०८३ मा मुद्दा संख्या बढेर २ सय ७५ पुगेको छ । अन्य मुद्दाको तुलनामा सवैभन्दा बढी लागूऔषध मुद्दाको बढ्ने क्रम देखिन्छ । दोस्रो नम्बरमा बैकिङ कसुर रहेको छ ।
विगत ७ वर्षको तथ्याङ्कलाई हेर्दा चितवनमा हरेक वर्ष लागूऔषध मुद्दाको संख्या बढ्दो क्रममा छ । आव ०७६÷०७७ मा ८५ वटामात्रै मुद्दा दर्ता भएकोमा आव ०८२/०८३ मा २७५ मुद्दा संख्या पुगेको हो । लागूऔषध कारोवार र सेवनको घटना अस्वाभाविकरुपमा बढेको भन्दै प्रहरीले कानुनी साक्षरता र कारबाहीलाई तीव्रता दिएको चितवन प्रहरी प्रमुख एसपी रामेश्वर पौडेलले बताए ।
जिल्ला प्रहरी कार्यालय चितवनका डिएसपी तथा प्रवक्ता चन्द्र भुसन यादवले फरक प्रकृतिका लागूऔषधमध्ये गाँजा र ट्रमाडोल अत्यधिक सेवन तथा बिक्रीवितरणको क्रममा फेला पर्ने गरेको बताए ।
गत वर्षमात्रै चितवन प्रहरीले १ हजार ५ सय ६० केजी गाँजा बरामद गरेको छ । त्यस्तै, ५५ हजार क्याप्सुल ट्रमाडोल वरामद गरेको छ । गत वर्षमात्रै चितवन प्रहरीले ३ बिगाहा १५ कठ्ठामा लगाएको गाँजा र १२ बिगाहा ४० कठ्ठामा लगाएको अफिम नष्ट गरेको थियो ।
‘मुद्दाको चाप हेर्दा पनि लागूऔषध बढी छ’, प्रवक्ता यादवले भने, ‘कारोबारी वा सेवनकर्ता जे भए पनि लागूऔषधमै मुद्दा चल्ने र अनुसन्धानको क्रममा संलग्नता यकिन हुने भएकाले सुरूमै कारोबारी वा प्रयोगकर्ता के हो भनी छुट्याउन सकिँदैन । लागूऔषध मुद्दामा प्रहरीलाई अनुसन्धानका लागि ९० दिनको समय हुन्छ ।’
उमेर समूहको हिसाबले हेर्दा २० देखि ३० वर्ष उमेर समूहका मानिसहरुको बढी संलग्नता देखिएको छ । पुरूषको तुलनामा महिलाको संख्या कम छ, तर लागूऔषधसम्बन्धी कसुरमा कम उमेरका बालकहरु समेत पक्राउ पर्ने गरेका छन् ।
युवा अवस्थामा मानिसहरु लागूऔषधको सेवन तथा कारोबारमा फस्नाले समाजमा समेत यसको नकारात्मक असर परेको प्रवक्ता यादव बताउँछन् । आव ०७७/०७८ मा ९५, आव ०७८/०७९ मा १०६, आव ०७९/०८० मा १०७, आव ०८०/०८१ मा १५१, आव ०८१/०८२ मा १८५ र आव ०८२/०८३ मा २७५ लागूऔषधसम्बन्धी मुद्दा दर्ता भएका छन् ।
