काठमाण्डौ — मकवानपुरको हेटौंडा उपमहानगरपालिका–१७ हटियामा रहेको कर्रा खोलामा आएको बाढीले खाली ट्रक बगाएको छ । आज बिहान पौने ८ बजे शिवम् सिमेन्ट फ्याक्ट्री नजिकै रहेको कर्रा खोलाको कल्भर्ट पार गर्ने क्रममा पानीको बहाव बढेपछि ट्रक बगाएको हो ।
प्रहरीका अनुसार सिमेन्ट फ्याक्ट्रीबाट ढुंगा अनलोड गरी फर्कँदै गरेको ना ७ ख ७६५ नम्बरको १२ चक्के आइचर ट्रक खोलामा आएको तीव्र बहावले बगाएको हो । ट्रकमा रहेका चालक चितवन रत्ननगर नगरपालिका–१३ का ३४ वर्षीय दीपक थिङ पौडिएर सकुशल बाहिर निस्कन सफल हुनु भएको छ ।
ट्रक चालक थिङको खुट्टामा सामान्य चोट लागेको प्रहरीले जनाएको छ । उहाँलाई थप उपचारका लागि चौघडाको स्थानिय मेडिकलमा पठाएको प्रहरीले जनाएको छ ।
