काठमाडौँ । नेपाली फिल्म क्षेत्रका लागि जेठ महिना पनि त्यति लाभदायक मान्न सकिँदैन । ६ वटा फिल्म प्रदर्शनमा आएको यस महिनाको कुल बक्स अफिस कलेक्सन ३ करोड ५५ लाख ९६ हजार ५२० रुपैयाँ (ग्रस कलेक्सन) मात्र रहेको छ । चलचित्र विकास बोर्डले सार्वजनिक गरेको तथ्याङ्कअनुसार यी फिल्म हेर्न १ लाख २२ हजार ३८० जना दर्शक हलसम्म पुगेका छन् । जेठ महिनामा प्रदर्शनमा आएका फिल्महरूमा ‘एक मुठ्ठी बादल’, ‘लाइफ ड्यामेज’, ‘काजी’, ‘मितज्यु’, ‘रोल नं १’ र ‘कुम्भ’ रहेका छन् ।
जेठमा प्रदर्शनमा आएका ६ फिल्ममध्ये बक्स अफिस कलेक्सनमा ‘रोल नम्बर १’ व्यावसायिक रूपमा सबैभन्दा अगाडि देखिएको छ । चलचित्र विकास बोर्डले गत आइतबार राती १२ बजेसम्म सार्वजनिक गरेको रिपोर्टअनुसार यस फिल्मले बक्स अफिसमा १ करोड ३५ लाख १५ हजार ९९३ रुपैयाँ ग्रस कलेक्सन गरेको छ । यो अवधिमा फिल्म हेर्नका लागि कुल ४७ हजार १५१ जना दर्शक हलसम्म पुगेका छन् ।
विनोद पौडेलको निर्माण र जोन योञ्जनको निर्देशन रहेको यस फिल्ममा मुकुन भुषाल, सुशांक कार्की, रेणु नाथ योगी र सिर्जना अधिकारी मुख्य भूमिकामा छन् । फिल्मले शिक्षा, पारिवारिक सम्बन्ध, विद्यार्थी जीवनका चुनौती र सामाजिक यथार्थलाई भावनात्मक ढंगले प्रस्तुत गरेको छ ।
दोस्रो स्थानमा रहेको फिल्म ‘मितज्यु’ ले पनि बलियो व्यापार गरेको छ । फिल्मको कुल व्यवसाय १ करोड ३२ लाख ५३ हजार ३४२ रुपैयाँ रहेको छ । यो अवधिमा यस फिल्मलाई ४६ हजार १५४ दर्शकले हलमा हेरेका छन् । जनक घर्ती मगरको निर्माण तथा अनिल बुढामगरको निर्देशन रहेको यो फिल्म ग्रामीण परिवेश र सम्बन्धको भावनात्मक कथामा आधारित छ । फिल्ममा दयाहाङ राई, सौगात मल्ल र डान्सर तेरिया फौज मगर मुख्य भूमिकामा छन् । ‘रोल नं १’ र ‘मितज्यु’ अझै पनि प्रदर्शनरत रहेकाले यिनीहरूको व्यवसाय अझै बढ्न सक्ने देखिन्छ ।
त्यस्तै, यस महिना प्रदर्शनमा आएको फिल्म ‘काजी’को व्यवसाय औसत रह्यो । फिल्मले बक्स अफिसमा कुल ४४ लाख ४८ हजार ६० रुपैयाँ ग्रस कलेक्सन गरेको छ । यस अवधिमा फिल्म हेर्न १४ हजार ३२४ जना दर्शक हलसम्म पुगेका छन् । रामप्रसाद रिजालको प्रस्तुतिमा लक्ष्मण रिजालले निर्देशन गरेको यस फिल्ममा विपिन कार्की र केकी अधिकारी मुख्य भूमिकामा छन् । फिल्मले प्रेमकथा पस्किएको छ ।
‘काजी’को तुलनामा ‘लाइफ ड्यामेज’को व्यवसाय केही कमजोर रह्यो । फिल्मले ३४ लाख ६६ हजार २९० रुपैयाँ ग्रस कलेक्सन गरेको छ । यस अवधिमा फिल्म हेर्ने दर्शकको संख्या ११ हजार ३७१ रहेको छ । पारिवारिक कथालाई फरक तवरले प्रस्तुत गरिएको यस फिल्ममा सुरक्षा पन्त, निमेष श्रेष्ठ र ईशा थापा लगायतको अभिनय छ । यो फिल्म निमेष श्रेष्ठले निर्देशन गरेका हुन् ।
त्यसैगरी, जेठ महिनामा प्रदर्शनमा आएका मध्ये सबैभन्दा कमजोर व्यवसाय गर्ने फिल्ममा ‘एक मुठ्ठी बादल’ र ‘कुम्भ’ देखिएका छन् । फिल्म ‘एक मुठ्ठी बादल’ले बक्स अफिसमा मात्र ५ लाख २१ हजार ८२५ रुपैयाँ ग्रस कलेक्सन गरेको छ । यो अवधिमा यो फिल्म केवल १ हजार ५०१ जना दर्शकले हेरेका छन् । फिल्मले नेपाली समाजमा गहिरो गरी जकडिएको दाइजो प्रथा र पारिवारिक जटिलताको विषय उठान गरेको छ । आँचल शर्मा, निशा शर्मा र उषा रजकको मुख्य भूमिका रहेको यो फिल्म साहारा शर्माले निर्देशन गरेकी हुन् ।
अर्को फिल्म ‘कुम्भ’को बक्स अफिस व्यवसाय भने ३ लाख ९१ हजार १० रुपैयाँ मात्र रहेको छ । यस अवधिमा यो फिल्म कुल १ हजार ८७९ जना दर्शकले हेरेका छन् । अशोक आर्यन, सुनील थापा, सुशील पोखरेल लगायतको अभिनय रहेको यो फिल्म रणधीर श्रेष्ठले निर्देशन गरेका हुन् ।
