काठमाडौँ । झापाको गौरादह नगरपालिका र दमकको सिमानास्थित रतुवा खोलाको पुलमुनि केही दिन अघि बोरामा प्याक गरिएको अवस्थामा फेला परेको युवतीको शवको पहिचान खुलेको छ। जिल्ला प्रहरी कार्यालय झापाका अनुसार मृतक युवती दमक नगरपालिका–८ बसन्तटोल निवासी २१ वर्षीया रोमा भन्ने रमा तिवारी रहेको पुष्टि भएको हो।
प्रहरीले शवको पहिचान खुलाउन मृतकको बाँया हातमा रहेको ट्याटुको तस्वीरसहितको विवरण सार्वजनिक गर्दै सहयोगको अपिल गरेको थियो। उक्त सूचनाका आधारमा प्रहरीको सम्पर्कमा आएका मृतकका बुवा नारायण तिवारी र आमा मुना तिवारीले हिजो जेठ १७ गते सोही ट्याटु र अन्य शारीरिक चिन्हका आधारमा शवको सनाखत गरेका हुन्।
प्रहरीका अनुसार रमा जेठ १३ गते राति करिब ९ः३० बजे घरबाट निस्किएपछि सम्पर्कविहीन बनेकी थिइन्। परिवारले उनको खोजी गरिरहेकै अवस्थामा बिहीबार रतुवा खोलाको पुलमुनि बोराभित्र शंकास्पद अवस्थामा उनको शव फेला परेको थियो।
घटनाको प्रकृति हेर्दा मृत्यु अत्यन्तै शंकास्पद देखिएकाले प्रहरीले विभिन्न कोणबाट अनुसन्धान अघि बढाएको छ। मृत्युको वास्तविक कारण, घटनाको पृष्ठभूमि र यसमा अन्य व्यक्तिको संलग्नता भए-नभएको विषयमा सत्यतथ्य पत्ता लगाउन अनुसन्धानलाई तीव्र बनाइएको जिल्ला प्रहरी कार्यालय झापाले जनाएको छ। यस घटनाले दमक तथा आसपासका क्षेत्रमा त्रास र चासो बढाएको छ।
