साफ महिला च्याम्पियनसिपमा बंगलादेशसँगै भारत सेमिफाइनलमा
काठमाण्डौ – साफ महिला च्याम्पियनसिप अन्तर्गत समूह ‘बी’ बाट साबिक विजेता बंगलादेशसँगै भारत सेमिफाइनलमा प्रवेश गरेका छन् ।
हिजो सम्पन्न खेलमा बंगलादेशले मालदिभ्सलाई ४–२ ले पराजित गर्दै लगातार दोस्रो जीतसहित अन्तिम चारमा स्थान सुरक्षित गरेको हो । यससँगै मालदिभ्स लगातार दोस्रो हार बेहोर्दै प्रतियोगिताबाट बाहिरिने पहिलो टोली बनेको छ । समूह ‘ए’ मा नेपाल, भुटान र श्रीलङ्का प्रतिस्पर्धामा छन् ।
पहिलो खेलमा नेपालसँग १–० ले पराजित भएको भुटानले दोस्रो खेलमा श्रीलङ्कालाई ४–० ले हराउँदै सेमिफाइनलको सम्भावना कायम राखेको छ । नेपालले समूह चरणको अन्तिम खेलमा आइतबार श्रीलङ्कासँग प्रतिस्पर्धा गर्नेछ । खेल नेपालले बराबरी गरे पनि नेपाल सेमिफाइनलमा पुग्नेछ भने जीतेमा समूह विजेता बन्नेछ ।
