रत्ननगर । गत वर्ष मावि गबैका २१ जना विद्यार्थीलाई ल्यापटप दिँदा खैरहनी वडा नं–१३ का वडाध्यक्ष कुलप्रसाद भूषालविरूद्ध अख्तियारमा उजुरी प¥यो । विद्यार्थीको आवश्यकता र कानुनसम्मत भएका कारण अख्तियारमा हालेको उजुरीले खासै असर गरेन । मुद्दा सजिलै टुङ्गियो । वडाध्यक्ष भूषालले गलत काम गरेका थिएनन्, खालि उनले गरेको उदाहरणीय काम रोक्ने प्रयास गरिएको थियो । अख्तियारमा हालेको उजुरीले उनी रोकिएनन् ।
आर्थिक वर्ष २०८२/०८३ को विनियोजित बजेटबाट शुक्रबार सोही विद्यालयमा कक्षा ११ र १२ मा पढ्ने २५ जना विद्यार्थीलाई ल्यापटप प्रदान गरे । सामुदायिक विद्यालयको शैक्षिक गुणस्तर सुधार र सूचना प्रविधिमा विद्यार्थीलाई अब्बल बनाउन वडाध्यक्ष भूषालले ल्यापटप वितरण गरेका हुन् । ‘समय सुहाउँदो शिक्षाका लागि सुरूवात गरिएको काम रोक्ने प्रयास गरियो’, उनले भने, ‘तर हाम्रो कदम सानातिना कुराले रोकिँदैन ।’ वडाको विनियोजित बजेटमध्ये १५ लाख ४८ हजार लगानीमा २५ वटा ल्यापटप वितरण गरिएको हो ।
विद्यालय प्राङ्गढमा आयोजित एक औपचारिक कार्यक्रमका बीच मेयर शशिकुमार खनियाँ र वडाध्यक्ष भूषालले विद्यालयका प्राचार्य ऋषिप्रसाद खनाललाई र सोपछि विद्यार्थीलाई हस्तान्तरण गरेका थिए । सो अवसरमा मेयर खनियाँले शिक्षामा सूचना प्रविधिको प्रयोगसँग गरिब बस्तीमा गृहकार्य कक्षा, सिक्स टु सिक्स पढाइ, स्वयम्सेवक शिक्षक, दरबन्दी मिलानलाई प्राथमिकतामा राखेर काम गरेको बताए । स्थानीय र सरकारले सामुदायिक विद्यालयको गुणस्तर सुधारमा आवश्यक लगानी बढाउँदा अनावश्यक राजनीतिक हस्तक्षेपले गुणस्तर सुधारमा समस्या परेको उनको भनाइ छ । शिक्षा क्षेत्रका २३ वटा अधिकार कानुन नबनेका कारण स्थानीय सरकारले प्रयोग गर्न नसकेको मेयर खनियाँले बताए । ‘शिक्षामा राम्रो गर्न खोजेका छौँ’, उनले भने, ‘कहिले मन्त्रीले रोक्छन्, कहिले कानुजले रोक्छ ।’
वडाध्यक्ष भूषालले प्रचारबाजीका लागि ल्यापटप वितरण गरेको नभई यो समयको माग भएको बताए । ‘प्रचारकाजीका लागि ल्यापटप दिएका होइनौँ’, उनले भने, ‘यो विद्यार्थीको आवश्यकताको साधन हो ।’ चालू आवमा वडाको बजेटबाट सोही विद्यालयमा कक्षा ११ र १२ मा पढ्ने ५० जना विद्यार्थीलाई छात्रवृत्ति प्रदान गरिएको र त्यसका लागि ५० लाख विनियोजन गरेको वडाध्यक्ष भूषालले जानकारी दिए । सोही वडामा अवस्थित धर्मेश्वर आधारभूत विद्यालय र दिव्यज्योति आमाविलाई २÷२ लाख रूपैयाँ प्रदान गरिएको छ । वडाभित्रका सामुदायिक तथा सरकारी विद्यालयमा उच्च शिक्षा अध्ययन गर्ने १० जना विद्यार्थीलाई जनही २०÷२० हजारका दरले छात्रबृत्ति प्रदान गरेको वडाध्यक्ष भुषालले जानकारी दिए ।
प्रधानाध्यापक खनालले शिक्षाको गुणस्तर सुधार र उत्कृष्ट नतिजाका लागि आफूहरुले सक्दो प्रयास गरिरहेको र विद्यालयको प्रयासमा स्थानीय सरकार, सामुदायिक वन, मध्यवर्तीको सहयोग अनुकरणीय रहेको बताए । ‘हामीले दिनरात नभनी काम गरिरहेका छौँ’, उनले भने, ‘तर सामुदायिक विद्यालयका शिक्षकको हुर्मत लिन काम भइरहेको छ, यो बन्द हुनुपर्छ ।’
विद्यालयका सहायक प्रधानाध्यापक ईश्वरप्रसाद खनालले सञ्चालन गरेको उक्त कार्यक्रममा बूढीराप्ती मध्यवर्ती उपभोक्ता समितिका अध्यक्ष कृष्णलाल चौधरी, वडा सदस्य जीवन कार्की, कुमरोज मध्यवर्ती सामुदायिक वनका उपाध्यक्ष भीमसेन थापालगायतले मन्तव्य राखेका थिए । सोही कार्यक्रममा आधारभूत तह उत्तीर्ण परीक्षामा चार जिपिए ल्याएका विश्वास भण्डारीलाई सम्मान तथा पुरस्कृत गरिएको छ ।
