सिन्धुपाल्चोक । पूर्वगृहमन्त्री सुधन गुरुङ बास बस्न गएको भोटेकोशी हेली रिसोर्टबाट प्रहरीले कर्मचारीको मोबाइलसहित सीसीटीभीको उपकरण नियन्त्रणमा लिएको छ ।
आफूहरूलाई प्रहरी भन्दै साधा पोसाकका व्यक्तिहरूले ती सामान जफत गरेका हुन् । मङ्गलवार काठमाडौं उपत्यका अपराध अनुसन्धान कार्यालयको टोली त्यहाँ पुगेको उक्त कार्यालय प्रमुख एसएसपी सन्तोष खड्काले स्वीकारेका छन् । उनले कुनै चोरीसँग सम्बन्धित घटनाको अनुसन्धानका लागि ती सामान जफत गरेको भनेका छन् ।
प्रहरी भन्दै एउटा टोली त्यहाँ पुगेपछि रिसोर्टका एक कर्मचारीले नेपाल प्रेसलाई त्यसको जानकारी दिए । तर, तिनै कर्मचारीसहित सबैको मोबाइल प्रहरी टोलीले जफत गरेको छ ।
नेपाल प्रेसले त्यहाँ पुगेका व्यक्ति प्रहरी नै हुन् या अरू भन्नेबारे स्थानीय प्रहरी कार्यालयमा सम्पर्क गर्दा उनीहरूले अनभिज्ञता प्रकट गरे । तर, अपराध अनुसन्धानका एसएसपीले आफ्नो टोली पुगेको स्वीकार गरेका छन् ।
घटना के हो ?
प्रहरीले मङ्गलवार आफ्ना मोबाइलदेखि रिसोर्टमा जडान सीसीटीभीका सम्पूर्ण उपकरण जफत गरेपछि त्यहाँका कर्मचारी आतंकित छन् । उनीहरू काम छोडेर भयभीत स्थितिमा तातोपानी बजारमा भेटिए । एक कर्मचारीले यस्तो विवरण सुनाए-
गृहमन्त्री हुनुभन्दा केही दिन अगाडि (चैत पहिलो साता) सुधन गुरुङ यहाँ आएका थिए । उनीसँग केटी साथी पनि थिइन् । हामीलाई हाम्रो म्यानेजमेण्टले श्रीमती वा परिवारबाहेक अरू केटी लिएर आएका गेष्टसँग दुवैको आईडी माग्नु भनेको छ । उनीहरूले दिन मानेनन् । सुधन गुरुङ नामको एउटा आइडीचाहिँ अहिले पनि हामीसँगै छ ।
एक्कासि आज ‘हामी पुलिस हौँ, तिमीहरूको रिसोर्टबाट दुई महिना पहिले चोरी भएको छ, त्यसको फुटेज देऊ’ भन्दै केही मान्छे आए । हामीले यहाँका सबै पुलिस चिनेका छौँ । बुझ्दा उनीहरू तातोपानी चौकीको पुलिस हैन भन्ने भयो । हामीले म्यानेजर सरहरूलाई सोध्दा पत्रकारले चिन्न सक्छ भनेर हजुरको नम्बर दिनुभयो । शुरूमा आउँदा हामीले केही पनि दिएनौँ । एक छिनपछि त उनीहरू ठूलो दलबल लिएर आए । हाम्रो मोबाइल खोसे । सीसीटीभी र त्यसको सबै सामान लिएर गए । हामीलाई सरहरूले सर्च वारेन्ट माग्न भन्नुभएको थियो । त्यसो भन्दा उल्टै हप्कीदप्की गरे । कसैको सामान चोरी भएको भए एक-दुई दिनमा पो कम्प्लेन आउँछ । तर, उनीहरू दुई महिनाअगाडिको फुटेज माग्न आए । हाम्रो सिष्टममा दुई महिनासम्मको फुटेज सेभ नै हुँदैन । उनीहरूले हामी रिकभर गर्छौँ भनेका छन् ।
भोटेकोशी हेली रिसोर्ट सुवास प्रधानको लगानीमा सञ्चालित छ । उनी अहिले कास्की प्रहरी नियन्त्रणमा रहेका छन् ।
