राप्ती नगरपालिका वडा नं. ९ मा लक्षित वर्गका लागि सञ्चालन गरिने सिपमूलक तथा टोल विकास व्यवस्थापन तालिमको उद्घाटन समारोह सम्पन्न भएको छ। कार्यक्रम आज श्री दूधकोशी नमूना सामुदायिक वन उपभोक्ता समितिको सभाहलमा आयोजना गरिएको थियो।
कार्यक्रमको अध्यक्षता राप्ती नगरपालिका वडा नं. ९ का वडा अध्यक्ष खड्कबहादुर तामाङले गर्नुभएको थियो भने प्रमुख अतिथिका रूपमा राप्ती नगरपालिकाका प्रमुख प्रशासकीय अधिकृत प्रदीप पौडेलको उपस्थिति रहेको थियो। कार्यक्रममा विशिष्ट अतिथिका रूपमा कार्यपालिका सदस्य आइतीदेवी दवारी र मीना कुमारी हमाल सहभागी हुनुहुन्थ्यो।
त्यसैगरी अतिथिहरूमा वडा नं. ९ का सदस्य रामकुमार सुवेदी, लोसन तामाङ तथा सचिव जनककुमार सिंहको उपस्थिति रहेको थियो। ५ दिने च्याउ खेती तालिमका प्रशिक्षक पवन यादव, सभाहल उपलब्ध गराउने श्री दूधकोशी नमूना सामुदायिक वन उपभोक्ता समितिका अध्यक्ष फतेजंग तामाङ, मिलीजुली टोल विकास समितिका अध्यक्ष रमेश पौडेल, शुभ पारिजात टोल विकास समितिका अध्यक्ष सुलाकान्त न्यौपाने, संगम टोल विकास समितिका इन्द्रबहादुर तामाङ, टेकबहादुर सेनलगायत विभिन्न टोल विकास समितिका प्रतिनिधिहरू कार्यक्रममा सहभागी भएका थिए।
त्यसैगरी ७ दिने नेल आर्ट तालिमका प्रशिक्षक रेश्मा कुमारी तथा सहायक प्रशिक्षक मीरा चौधरीको पनि कार्यक्रममा उपस्थिति रहेको थियो। साथै राप्ती नगरपालिका वडा नं. ९ का सम्पूर्ण कर्मचारीहरूको समेत सहभागिता रहेको थियो।
कार्यक्रमको मुख्य उद्देश्य वडास्तरमा सिपमूलक तालिम सञ्चालन गरी स्थानीय स्तरमै रोजगार सिर्जना गर्नु रहेको आयोजकले जनाएको छ।
