सगरमाथा आरोहणका लागि अहिलेसम्मकै धेरैले लिए अनुमती, कति रोयल्टी सङ्कलन भयाे ?
काठमाण्डौ – सगरमाथा आरोहणका लागि अहिलेसम्मकै धेरै व्यक्तिले आरोहण अनुमती लिएका छन् । पर्यटन विभागका अनुसार यस वर्षको वसन्तकालिन सिजनमा सगरमाथा आरोहणका लागि ४ सय ९२ जनाले अनुमती लिएका छन् ।
यो सङ्ख्या अनुमती लिने वार्षिक तथ्याङ्क अनुसार अहिलेसम्मकै बढी रहेको पर्यटन विभागका निर्देशक हिमाल गौतमले जानकारी दिनुभयो । सगरमाथा आरोहण अनुमतीवापत सरकारले वसन्तकालिन सिजनमा १ अर्ब ७ करोड ४० लाख रुपैयाँ सङ्कलन गरेको छ । यो रकम पनि अहिलेसम्मकै धेरै हो ।
यस अघि सगरमाथामा वसन्तकालिन आरोहणका लागि विदेशी नागरिकले ११ हजार डलर रोयल्टी तिनुपर्ने व्यवस्था रहेकोमा सरकारले यस वर्षदेखि बढाएर १५ हजार डलर पुर्याएकाे छ ।
यसैबीच यो सिजनको आरोहणका लागि सगरमाथाको चौथो शिविरसम्म बाटो बनाउने काम सम्पन्न भएको छ । डोरी टाँग्दै बाटो खुलाउन खटिएका अनुभवी आरोहीहरुको टोली हिजो चौथो शिविरमा पुगेका निर्देशक गौतमले जानकारी दिनुभयो । सगरमाथा आरोहणका क्रममा चौथो शिविरसम्म शिविर स्थापना गरिन्छ ।
अब मौसमको अनुकुलता हेरेर शिखरसम्मको बाटो खुलाउने पर्यटन विभागले जनाएको छ । यो वर्षको वसन्तकालिन आरोहणका लागि नेपालका ३० वटा हिमालमा गरी १ हजार १ सय ३४ जना आरोहीले अनुमती लिएका छन् । उनीहरुबाट सरकारले १ अर्ब २४ करोड ४१ लाख रुपैयाँ रोयल्टी संकलन गरेको छ ।
