काठमाडौँ । नेपाल सरकारले सीमावर्ती भारतीय बजारबाट बिना भन्सार सामान भित्र्याउने कार्यमा कडाइ गरेपछि रुपन्देही क्षेत्रका उद्योग–व्यवसायहरू चलायमान बन्न थालेका छन् । घरायसी प्रयोजनका नाममा भारतबाट १ सय रुपैयाँभन्दा बढी मूल्यका सामान ल्याउँदा अनिवार्य भन्सार महसुल तिर्नुपर्ने नियम लागू भएपछि सुनौली नाका क्षेत्रका नेपाली व्यापारीहरूले खुसी व्यक्त गरेका छन् ।
यसअघि स्थानीय नागरिकहरू सानोतिनो किनमेलका लागि पनि भारतीय बजार जाने गरेकाले नेपाली बजार सुनसान हुने र राज्यको राजस्वमा समेत गिरावट आउने गरेको थियो । अहिले पारिबाट ल्याइने सामानमा भन्सार लाग्ने भएपछि ती सामान महँगो पर्न गई उपभोक्ताहरू नेपाली बजारतर्फ नै आकर्षित हुन थालेका छन्, जसले स्वदेशी बजारको प्रवद्र्धनमा सहयोग पुर्याएको छ ।
यस कदमलाई उद्योगी–व्यवसायीहरूले सकारात्मक रूपमा लिँदै तस्करी नियन्त्रणका लागि अनिवार्य भन्सारको व्यवस्था प्रभावकारी हुने विश्वास व्यक्त गरेका छन् । चेम्बर अफ कमर्श, रुपन्देहीका अध्यक्ष सचिन रोक्काले अवैध रूपमा सामान भित्र्याउने कार्य र रात्रिको समयमा हुने तस्करीलाई रोक्नुपर्नेमा जोड दिएका छन् ।
त्यस्तै, सिद्धार्थ उद्योग वाणिज्य सङ्घका पूर्वअध्यक्ष विष्णुप्रसाद शर्माले भारतमा सामान सस्तो पाइन्छ भन्ने मानसिकता बदल्न जरुरी रहेको बताउँदै कतिपय सामान नेपालमै सस्तो रहेको उल्लेख गरेका छन् । नेपाल उद्योग वाणिज्य महासङ्घ लुम्बिनी प्रदेशका अध्यक्ष ठाकुरकुमार श्रेष्ठका अनुसार यो नियमको पालनाले राजस्व वृद्धि हुनुका साथै सीमा क्षेत्रमा हुने लागुऔषध सेवनजस्ता विकृति न्यूनीकरणमा समेत मद्दत पुग्नेछ ।
भैरहवा भन्सार कार्यालय बेलहियाले हाल १०० रुपैयाँभन्दा बढीका सामान ल्याउने सर्वसाधारणलाई भन्सार तिर्नुपर्ने विषयमा जागरुक बनाउँदै महसुल सङ्कलन गरिरहेको छ । भन्सार अधिकृत उद्धव ढुङ्गानाका अनुसार घरायसी प्रयोजनका लागि न्यून परिमाणमा ल्याइने सामानलाई व्यावहारिक रूपमा हेरिए पनि अन्यको हकमा कानुनअनुसार भन्सार लगाउने गरिएको छ ।
पहिलेदेखि नै रहेको यो नियमलाई अहिले सरकारले कडाइका साथ कार्यान्वयन गरेपछि सुरुमा केही असहज महसुस गरेका स्थानीयहरूमा पनि विस्तारै भन्सार तिर्ने बानी पर्न थालेको छ । यसले लामो समयदेखि सङ्कटमा रहेका सीमा क्षेत्रका नेपाली पसल तथा व्यवसायहरूलाई पुनर्जीवन दिने अपेक्षा गरिएको छ ।
