काठमाडौँ । राष्ट्रिय स्वतन्त्र पार्टी (रास्वपा) ले आगामी स्थानीय निर्वाचनका लागि उम्मेदवार बन्न प्रविधिमैत्री हुनुपर्ने र डिजिटल दुर्व्यवहारमा संलग्न नभएको हुनुपर्ने कडा व्यवस्था गरेको छ । पार्टीले सार्वजनिक गरेको ‘उम्मेदवार छनोट रूपरेखा, २०८३’ अनुसार सम्भावित उम्मेदवारहरूले कुनै पनि प्रकारको डिजिटल अपराध र सामाजिक दुर्व्यवहारमा संलग्न नरहेको भनी स्वघोषणा गर्नुपर्नेछ ।
रास्वपाको नयाँ मापदण्ड अनुसार उम्मेदवार बन्न चाहने व्यक्तिले कानुनी रूपमा प्रमाणित नभएको अवस्थामा समेत आफू घरेलु हिंसा, यौनजन्य दुर्व्यवहार वा सार्वजनिक स्थलमा अमर्यादित व्यवहारमा संलग्न नरहेको स्पष्ट पार्नुपर्नेछ । विशेषगरी डिजिटल क्षेत्रमा सामाजिक सञ्जालको दुरुपयोग गरी गरिने साइबर बुलिङ, कसैको चरित्रहत्या, अनलाइन ठगी वा अन्य कुनै पनि प्रकारको डिजिटल दुर्व्यवहारमा आफ्नो संलग्नता नरहेको कुरा उम्मेदवारले अनिवार्य रूपमा स्वघोषणा गर्नुपर्ने व्यवस्था रूपरेखामा गरिएको छ ।
त्यस्तै, रास्वपाले उम्मेदवारका लागि ‘प्रविधिमैत्री प्रशासन र डिजिटल साक्षरता’ लाई योग्यताको रूपमा अघि सारेको छ । जसमा दैनिक कार्यालय सञ्चालनका लागि अनिवार्य मानिने ईमेल, वर्ड र एक्सेल जस्ता सफ्टवेयरहरूको सञ्चालन सीप हुनुपर्ने उल्लेख छ । नागरिकलाई प्रदान गरिने सेवालाई आधुनिक बनाउन नागरिक एप, राष्ट्रिय परिचयपत्र र व्यक्तिगत घटना दर्ता प्रणालीको ज्ञान हुनुका साथै प्रविधिमार्फत सेवा प्रवाहमा सहजीकरण गर्न सक्ने क्षमतालाई पार्टीले अनिवार्य सर्त बनाएको छ ।
यसका साथै, सेवाको समयसीमा मापन गर्ने डिजिटल प्रणाली, जनसहभागिता र गुनासो व्यवस्थापनका लागि डिजिटल प्लेटफर्महरू सञ्चालन गर्ने सीप पनि उम्मेदवारमा हुनुपर्नेछ । साइबर सुरक्षाका आधारभूत पक्षहरू, भ्रामक/मिथ्या सूचना (Misinformation/Disinformation) पहिचान गर्ने क्षमता र नीतिगत मस्यौदा निर्माणमा आर्टिफिसियल इन्टेलिजेन्सको उत्तरदायी प्रयोग गर्ने सीपलाई पनि रास्वपाले प्राथमिकतामा राखेको छ ।
पार्टीभित्रको प्रारम्भिक निर्वाचन (प्राइमरी) लाई निष्पक्ष बनाउन रास्वपाले अनलाइन मतदान, ‘टु–फ्याक्टर अथेन्टिकेसन’ र मतदानको तथ्याङ्क सुरक्षित राख्न ‘ब्लकचेन’ प्रविधिको प्रयोग गर्ने नीति समेत अख्तियार गरेको छ । प्रविधिको प्रयोगमार्फत निर्वाचन प्रक्रियामा हुन सक्ने धाँधली रोक्न र योग्य एवं प्रविधिमैत्री नेतृत्व चयन गर्न यस्तो व्यवस्था गरिएको पार्टीको रूपरेखामा उल्लेख छ ।
