चितवन — अव्यवस्थित बसोबासी तथा भूमिहीन सुकुम्बासीमाथि सरकारद्वारा गरिएको भनिएको दमनप्रति आपत्ति जनाउँदै श्रम संस्कृति पार्टीले जिल्ला प्रशासन कार्यालय चितवनमा ज्ञापन पत्र बुझाएको छ।
पार्टीले हालै सुकुम्बासी नागरिकमाथि गरिएको बल प्रयोग, घरटहरा भत्काउने कार्य र अमानवीय व्यवहारप्रति गम्भीर ध्यानाकर्षण भएको जनाएको छ। संविधानले प्रत्येक नागरिकलाई सम्मानजनक बसोबासको अधिकार सुनिश्चित गरेको अवस्थामा राज्य स्वयंले कमजोर तथा विपन्न वर्गमाथि दमन गर्नु अन्यायपूर्ण र अस्वीकार्य भएको पार्टीको भनाइ छ।
ज्ञापन पत्रमा वर्षौंदेखि बसोबास गर्दै आएका अव्यवस्थित बासिन्दा तथा भूमिहीन नागरिकहरूको समस्या समाधान गर्नुको सट्टा बलपूर्वक हटाउने र आतंक सिर्जना गर्ने कार्य मानवअधिकारको ठाडो उल्लंघन भएको उल्लेख गरिएको छ। पार्टीले सुकुम्बासी समस्या केवल कानुनी वा प्रशासनिक विषय नभई सामाजिक न्याय, समानता र मानवीय गरिमासँग प्रत्यक्ष जोडिएको विषय भएको पनि स्पष्ट पारेको छ।
यसै सन्दर्भमा श्रम संस्कृति पार्टीले सरकारसँग चार बुँदे माग अघि सारेको छ। जसअनुसार सुकुम्बासीमाथि भएको दमन तत्काल बन्द गर्न, प्रभावितलाई वैकल्पिक बसोबासको सुनिश्चितता गर्न, निष्पक्ष छानबिन गरी व्यवस्थापन प्रक्रिया अघि बढाउन तथा दीर्घकालीन, न्यायोचित र व्यवहारिक नीति अवलम्बन गर्न माग गरिएको छ।
पार्टीले आफूहरू सधैं श्रमिक, गरिब, उत्पीडित तथा सीमान्तकृत समुदायको पक्षमा उभिँदै आएको उल्लेख गर्दै आगामी दिनमा पनि यस्ता गतिविधिविरुद्ध सशक्त आवाज उठाउने प्रतिबद्धता जनाएको छ।
