दाउन्नेको पूर्वी खण्डमा एकतर्फी ढलान अन्तिम चरणमा
काठमाण्डौ — नारायणगढ–बुटवल सडक विस्तार आयोजना अन्तर्गत नवलपुरको दाउन्ने क्षेत्रको पूर्वी खण्डमा एकतर्फी ढलानको काम अन्तिम चरणमा पुगेको छ । अब झण्डै २ सय मिटर सडकमा मात्रै ढलान गर्न बाँकी रहेको आयोजनाले जनाएको छ ।
आयोजनाको पूर्वी खण्डका सूचना अधिकारी शिव खनालका अनुसार २ सय मिटर ढलान सम्पन्न भएपछि एकतर्फी सडक पूर्णरूपमा जोडिनेछ र गाडी आवतजावत सहज हुनेछ । दाउन्नेको पूर्वी खण्डको कुल लम्बाइ झण्डै ४ किलोमिटर रहेको छ ।
हाल यस क्षेत्रमा झण्डै ३३ मिटर लम्बाइको ढलानयुक्त सडकमा गाडी सञ्चालन भइरहेको छ भने झण्डै ४ सय मिटर ढलान सम्पन्न भएको खण्डमा अझै गाडी सञ्चालन शुरु गरिएको छैन । वर्षायाम अघि नै पूर्वी खण्डमा ढलानयुक्त सडक जोड्ने लक्ष्यसहित काम भइरहेको आयोजनाले जनाएको छ ।
नवलपरासी पूर्वी खण्डअन्तर्गत पर्ने ६५ किलोमिटर सडकमा हाल करिब सात किलोमिटर मात्रै कच्ची रहेको छ भने बाँकी सबै भागमा कालोपत्र तथा पक्की सडकमा यात्रा गर्न सकिने अवस्था छ । यस खण्डको समग्र भौतिक प्रगति ८१ प्रतिशत पुगेको छ ।
यता दाउन्नेको पश्चिम खण्डमा पर्ने १० किलोमिटरमध्ये तीन किलोमिटरमा एक तह कालोपत्र सम्पन्न भइसकेको छ।
