भरतपुर । बकुलहर रत्ननगर अस्पतालमा सुत्केरीको मृत्युको विषयलाई लिएर पीडित परिवार र प्रशासनबीच भएको वार्ता सहमतिमा टुङ्गो लागेको छ ।
रत्ननगर नगरपालिका वडा नं. ४ की २७ वर्षिया अस्मिता तामाङ विकको बिहीबार राती मृत्यु भएको थियो । पीडित परिवारले ‘चिकित्सकको लापरबाही’ भन्दै अस्पतालमा विरोध गरेका थिए । विरोधपछि अस्पतालमा केही समय तनाव सिर्जना भएको थियो ।
अस्पतालका सूचना अधिकारी राजकुमार घिमिरेका रत्ननगर नगरपालिकाको रोहवरमा मौखिक तीन वटा बुँदामा सहमति भएपछि अस्मिताको शव उठाउन पीडित परिवार तयार भएका हुन् । अस्मिताको दुई सन्तानलाई रत्ननगर नगरपालिकाले निःशुल्क शिक्षा प्रदान गर्ने भएको छ । वार्तामा रत्ननगर नगरपालिकाका प्रमुख प्रलाद सापकोटा पनि उपस्थिति थिए ।
पीडित परिवारमध्ये एक जनालाई रोजगार दिने र घटनाको सत्यतथ्य पत्ता लगाई कमजोरी गर्नेलाई कारबाही समेत गर्ने मौखिक सहमति भएको छ । सूचना अधिकारी घिमिरे सहमतिपछि अस्पताल शान्त भएको बताए । अस्मिताको शव भरतपुर अस्पतालमा छ । त्यहाँबाट परिवारले शव उठाउने सहमति भएको सूचना अधिकारी घिमिरेले बताए ।
अस्पतालका मेडिकल सुपरिटेण्डेण्ट डा. अंकुर पौडेलका अनुसार वैशाख ९ गते बुधबार अस्मिताले शल्यक्रिया मार्फत् शिशु जन्माएकी हुन् । १० गते बिहीबार साँझसम्म आमा र बच्चाको स्वास्थ्य राम्रो थियो, तर बिहीबार राती एक्कासी फोक्सोको नलीमा रगत जमेको अस्पतालको भनाइ छ ।
अस्पतालमा फोक्सो र मुटु रोग विशेषज्ञ नभएका कारण र पर्याप्त आईसियु पनि नभएपछि चितवन मेडिकल कलेज सिफारिस भएको थियो । चितवन मेडिकल कलेज ल्याउनसाथ चिकित्सकले मृत घोषणा गरेका थिए । अस्मिताको अहिले जन्मेको दोस्रो सन्तान छोरी हुन् । छोरीको स्वास्थ्य अवस्था राम्रो छ । अस्मिताका यसअघि छोरा छन् ।
