जीतपुर । पथलैयामा ट्राफिक प्रहरीले ओभरलोड मालवाहक सवारीसाधनविरुद्ध कडाइ बढाएको छ। क्षमताभन्दा बढी सामान बोकेर गुड्ने सवारीलाई लक्षित गर्दै सुरु गरिएको निगरानी अभियानअन्तर्गत दुई दिनमै ६ वटा गाडी कारवाहीमा परेका छन्।
नेपाल राजमार्ग सुरक्षा तथा ट्राफिक व्यवस्थापन कार्यालयका अनुसार ती सवारीबाट १ लाख ४५ हजार रुपैयाँ राजश्व संकलन गरिएको छ। प्रवक्ता तथा प्रहरी नायब उपरीक्षक वकिलबहादुर सिंहका अनुसार अब ओभरलोड सवारीलाई सामान्य जरिवाना गरेर छाड्ने अभ्यास हटाइएको छ। यस्ता सवारीलाई सिधै वीरगञ्जस्थित यातायात व्यवस्था कार्यालय पठाइ कडाभन्दा कडा कारवाही गरिने व्यवस्था लागू गरिएको छ।
उनले मधेश प्रदेशभरका मातहत कार्यालयलाई पनि ओभरलोड नियन्त्रणमा सक्रिय हुन निर्देशन दिएका छन्। “निर्देशिका २०७४ अनुसार तोकिएको सीमा पालना गर्न चालकलाई सचेत गराउँदै अटेर गर्नेलाई अनिवार्य कारवाहीमा ल्याइनेछ,” उनले भने।
कार्यालयका तथ्यांकअनुसार चालु आर्थिक वर्षको वैशाख १० गतेसम्म २६५ ओभरलोड सवारी कारवाहीका लागि सिफारिस भइसकेका छन्, जसबाट ४० लाखभन्दा बढी राजश्व संकलन भएको छ। ट्राफिक कारवाहीको दायरा ओभरलोडमा मात्रै सीमित छैन। चैत मसान्तसम्म ८० हजारभन्दा बढी सवारीमाथि गरिएको कारवाहीबाट ७ करोडभन्दा बढी राजश्व उठेको छ भने मापसे गरेर सवारी चलाउने ३ हजार २ सय ४५ चालकलाई पनि कारवाही गरिएको छ।
यसै अवधिमा जनचेतना बढाउन १६ हजारभन्दा बढी कार्यक्रम सञ्चालन गरिएको र ७ लाखभन्दा बढी नागरिक लाभान्वित भएको कार्यालयले जनाएको छ। मधेश प्रदेशमा बढ्दो दुर्घटनालाई लक्षित गर्दै ट्राफिक प्रहरीले विशेष निगरानी तीव्र पारेको छ। चालु वर्षमै ६ हजारभन्दा बढी दुर्घटना हुँदा ३ सय ९८ जनाले ज्यान गुमाएका छन् भने ९ हजारभन्दा बढी घाइते भएका छन्।
त्यसैगरी पटक–पटक नियम उल्लंघन गर्ने १५ जना चालकको लाइसेन्स निलम्बनका लागि सिफारिस गरिएको छ ।
