राप्ती, भण्डारा — “प्राङ्गारिक कृषि : अवसर र चुनौती” विषयक एक महत्वपूर्ण छलफल कार्यक्रम आज राप्ती नगरपालिकाको सभाहलमा सम्पन्न भएको छ। कार्यक्रमको आयोजना जिल्ला प्राङ्गारिक संघ चितवन (खादका लागि कृषि अभियान) ले गरेको हो।
कार्यक्रममा जिल्ला प्राङ्गारिक संघ चितवनका अध्यक्ष चन्द्र प्रसाद अधिकारीको अध्यक्षता रहेको थियो भने प्रमुख अतिथिका रूपमा शमशेर लामा उपस्थित थिए। कार्यक्रमको संयोजन उद्वव अधिकारीले गरेका थिए।
त्यस्तै कार्यक्रममा प्रमुख प्रशासनिक अधिकृत प्रदिप पौडेल, वडा नं. ७ का वडाध्यक्ष सुमिता डल्लाकोटी, जिल्ला प्रशासन सचिव मोहन सिंह तथा सहसचिव मान कुमार चौलागाईं लगायतको उपस्थिति रहेको थियो।
कार्यक्रममा संयोजक उद्वव अधिकारीले कृषि क्षेत्रमा रहेका अवसर र चुनौतीका विषयमा विस्तृत रूपमा प्रकाश पार्दै रासायनिक र प्राङ्गारिक मलबीचको भिन्नता स्पष्ट पारेका थिए। उनले प्राङ्गारिक खेतीको महत्व तथा यसको दीगो प्रभावबारे सहभागीहरूलाई जानकारी गराएका थिए।
त्यसैगरी अध्यक्ष चन्द्र प्रसाद अधिकारीले प्राङ्गारिक खेती कसरी गर्ने, यसको लागत कति लाग्छ, उत्पादन कस्तो हुन्छ लगायतका विषयमा विस्तृत प्रस्तुति दिएका थिए। उनले रासायनिक मलको प्रयोगबाट स्वास्थ्य तथा माटोमा पर्ने असरबारे पनि सचेत गराउँदै प्राङ्गारिक उत्पादनको पहिचान गर्ने तरिका तथा तरकारीको बजार व्यवस्थापनका उपायहरूबारे जानकारी दिएका थिए।
कार्यक्रममा सहभागीहरूले प्राङ्गारिक कृषिको प्रवर्द्धन गर्न आवश्यक नीति, प्रविधि र बजार व्यवस्थापनमा जोड दिनुपर्ने आवश्यकता औंल्याएका थिए।
