चितवन — राप्ती नगरपालिका वडा नं. ४ मा युवालाई सीपमूलक तालिममार्फत स्वरोजगार बनाउने उद्देश्यले कफि मेकिङ्ग तथा बार टेन्डिङ्ग तालिम सञ्चालन हुने भएको छ। वडाले तालिममा सहभागी हुन इच्छुक वडावासीलाई आवेदन दिन आह्वान गर्दै सूचना जारी गरेको छ।
वडा कार्यालयका अनुसार सूचना प्रकाशित भएको मितिले ७ दिनभित्र इच्छुक वडावासीले आवेदन पेश गर्नुपर्नेछ। तालिममा जम्मा २० जना सहभागी छनोट गरिनेछ भने छनोट प्रक्रिया अन्तर्वार्तामार्फत हुने जनाइएको छ।
तालिममा सहभागी हुन आवेदक राप्ती नगरपालिका वडा नं. ४ का स्थायी नागरिक हुनुपर्नेछ। साथै आवेदकले एसईई वा एसएलसी उत्तीर्ण गरेको हुनुपर्ने मापदण्ड तोकिएको छ। वडाले कमजोर आर्थिक पृष्ठभूमि भएका, दलित समुदायका तथा फरक क्षमता भएका आवेदकलाई प्राथमिकता दिने जनाएको छ।
यसैगरी आवेदकले चालु आर्थिक वर्षमा वडाले सञ्चालन गरेको समान प्रकृतिको अन्य तालिममा सहभागिता नगरेको हुनुपर्ने शर्त पनि राखिएको छ। तालिमका लागि आवेदकको उमेर १८ वर्षदेखि ३५ वर्ष बीच हुनुपर्नेछ।
आवेदन दिन चाहनेले २ प्रति हालसालै खिचेको पासपोर्ट साइज फोटो, नागरिकताको प्रमाणित प्रतिलिपि र शैक्षिक प्रमाणपत्र सहित राप्ती नगरपालिका–४ को हाल अस्थायी रुपमा रहेको वडा कार्यालयमा स्वयं उपस्थित भई आवेदन फाराम भर्नुपर्ने व्यवस्था गरिएको छ।
वडा नं. ४ का अध्यक्ष केदार प्रसाद आचार्यले यस्तो तालिमले युवालाई सीप सिकाएर स्वरोजगारतर्फ उन्मुख बनाउन महत्वपूर्ण भूमिका खेल्ने बताए। उनले वडाका इच्छुक युवालाई समयमै आवेदन दिन आग्रह गरेका छन्।
