पुर्ण बहादुर मगर
चितवन, मंसिर — प्रतिनिधि सभा सदस्य निर्वाचन २०८२ अन्तर्गत चितवन क्षेत्र नं. १ मा कुल १ लाख ४५ हजार ६ सय ३१ मतदाताले आज मतदान गदँैछन । निर्वाचन आयोग, नेपालको तथ्यांकअनुसार यस क्षेत्रमा पुरुष मतदाता ७३ हजार ६ सय ५१ (४९.३० प्रतिशत) र महिला मतदाता ७१ हजार ९ सय ८० (५०.७० प्रतिशत) रहेका छन् । महिला मतदाताको संख्या प्रतिशतका आधारमा पुरुषभन्दा केही बढी देखिएको छ ।
निर्वाचनका लागि यस क्षेत्रमा ९६ मतदान स्थल र १ सय ६८ मतदान केन्द्र तोकिएका छन्। मतदातालाई सहज रूपमा मतदान गर्न आवश्यक व्यवस्थापन गरिएको निर्वाचन कार्यालयले जनाएको छ। सुरक्षादेखि मतदान सामग्री व्यवस्थापनसम्मका तयारी अन्तिम चरणमा पुगेको छ।
चितवन–१ मा कुल १८ जना उम्मेदवार प्रतिस्पर्धामा उत्रिएका थिए भने प्रगशिल लोकतानित्रक पार्टीका उम्मेदवार विकास कामीले नेकपाका उम्मेदवार डा कृष्णराज पन्तलाई सर्मथन गरेपछि १७ जना छन् । तीमध्ये १४ जना विभिन्न राजनीतिक दलका तर्फबाट र ३ जना स्वतन्त्र उम्मेदवार रहेका छन्। उम्मेदवारमध्ये १५ जना पुरुष र २ जना महिला छन्। यसले उम्मेदवार तहमा महिला सहभागिता अझै सीमित रहेको देखाएको छ।
मुख्य प्रतिस्पर्धीका रूपमा नेपाल कम्युनिष्ट पार्टी (एकीकृत माओवादी केन्द्र)का तर्फबाट दाबी दोर्जे लामा, नेपाली कांग्रेसका राजेन्द्र प्रसाद बुढाथोकी र नेपाल कम्युनिष्ट पार्टीका कृष्णराज पन्त मैदानमा छन्। यस्तै राष्ट्रिय स्वतन्त्र पार्टीका हरि ढकाल, राष्ट्रिय प्रजातन्त्र पार्टीका वरदान शर्मा खनाल, जनता समाजवादी पार्टी नेपालका अजय ठाकुर हजाम, नेपाल मजदुर किसान पार्टीका अर्जुन प्रसाद, राष्ट्रिय जनमोर्चाकी सीता देवी क्षेत्री, मंगोल नेशनल अर्गनाइजेसनका प्रेमलाल चौधरी, नेपाल कम्युनिष्ट पार्टी (संयुक्त)का दुर्गा दत्त अर्याल, नेशनल रिपब्लिक नेपालका ईश्वरी गुरुङ, श्रम संस्कृति पार्टीका अनिल तामाङ, नेपाल कम्युनिष्ट पार्टी (माओवादी)का गणेश बहादुर श्रेष्ठ, उज्यालो नेपाल पार्टीका धन बहादुर गुरुङ लगायतका उम्मेदवार चुनावी प्रतिस्पर्धामा छन्। तीन जना स्वतन्त्र उम्मेदवार पनि मैदानमा छन्।
उम्मेदवारहरूको समावेशी विवरणअनुसार ५० प्रतिशत खस–आर्य, ३३.३३ प्रतिशत आदिवासी÷जनजाति, ५.५६ प्रतिशत थारु, ५.५६ प्रतिशत दलित र ५.५६ प्रतिशत मधेसी समुदायबाट उम्मेदवारी परेको छ। यसले जातीय तथा सामुदायिक प्रतिनिधित्वमा विविधता देखाएको छ, यद्यपि महिला सहभागिता न्यून रहेको तथ्यांकले देखाउँछ।
उम्मेदवारहरूले घरदैलो, सभा–समारोह तथा मतदाता भेटघाटलाई तीव्रता दिएका छन्। विकास निर्माण, रोजगारी सिर्जना, शिक्षा, स्वास्थ्य र सुशासन मुख्य एजेन्डाका रूपमा अघि सारेका थिए । मतदाताले भने विगतका प्रतिबद्धता कार्यान्वयनको अवस्थालाई आधार मानेर निर्णय गर्ने संकेत दिएका छन्।
चितवन–१ मा हुने प्रतिस्पर्धालाई चासोका साथ हेरिएको छ। मतदाताको सक्रिय सहभागिता र शान्तिपूर्ण मतदानमार्फत लोकतान्त्रिक अभ्यासलाई अझ सुदृढ बनाउने अपेक्षा गरिएको छ ।