सिरहामा गोली लागेर मृत्यु भएका १५ वर्षीय गणेश यादवका परिवार, आफन्त र स्थानीयवासीले प्रधानमन्त्री बालेन्द्र (बालेन) शाह र गृहमन्त्री सुधन गुरुङविरुद्ध प्रदर्शन गरेका छन्।
सुनसरी घटनापछि सिरहाको गोलबजारमा भएको प्रदर्शनका क्रममा ज्यान गुमाएका औरही गाउँपालिका–२ तुलसियाहीका गणेश यादवको परिवारलाई भेट्न गृहमन्त्री गुरुङ आउने सूचना पाएपछि स्थानीयले बनिनिया चोकमा विरोध प्रदर्शन गरेका हुन्।
प्रदर्शनकारीहरूले हातमा विभिन्न प्लेकार्ड बोकेर बालेन सरकार र गृहमन्त्रीविरुद्ध नाराबाजी गरेका छन्। उनीहरूले “मृतकले न्याय नपाउञ्जेल गृहमन्त्रीलाई गाउँ प्रवेश गर्न नदिने” चेतावनीसमेत दिएका छन्।
गोली प्रहारबाट १५ वर्षीय बालकको मृत्यु भएको घटनाले स्थानीयमा तीव्र आक्रोश फैलिएको छ। पीडित परिवारले घटनाको निष्पक्ष छानबिन, दोषीमाथि कडा कारबाही र न्यायको सुनिश्चितता माग गर्दै आन्दोलनलाई निरन्तरता दिएका छन्।
यस घटनापछि सिरहाको सुरक्षा अवस्था संवेदनशील बनेको छ भने स्थानीय प्रशासनले परिस्थितिमाथि निगरानी बढाएको जनाएको छ। मृतक परिवारसँग भेटका लागि गृहमन्त्रीको कार्यक्रमलाई लक्षित गर्दै विरोध प्रदर्शन चर्किएसँगै क्षेत्रको अवस्था थप तनावपूर्ण बनेको छ।
