काठमाण्डाै – निजी लगानीकर्ताहरूलाई आफ्ना प्रतियोगिताहरूको हिस्सेदारी बिक्री गर्ने विवादास्पद योजनालाई निरन्तरता दिने प्रतिबद्धता जनाउँदै फिफाले ‘कसैले पनि फुटबल बिक्री गरिरहेको छैन’ भनेको छ ।
युरोपेली फुटबलको नियामक निकाय ‘यूईएफए’ ले यो योजना अघि बढेको खण्डमा विश्वकप बहिष्कार गर्ने हिजो निर्णय गरेको छ ।
उत्तर तथा मध्य अमेरिकामा फुटबलको नियमन गर्ने र यस वर्षको विश्वकप आयोजना गरेको संस्था ‘कोन्काकाफ’ ले आफ्ना ४१ सदस्य सङ्घहरूले फिफा अध्यक्ष जियानी इन्फान्टिनोले अघि सारेको प्रस्तावलाई ‘अस्वीकार’ गरेको जनाएको छ ।
फिफाले विश्व फुटबलको सञ्चालन गर्छ र इन्फान्टिनोको प्रस्ताव पारित हुनका लागि यसका २११ सदस्यमध्ये १०६ को समर्थन आवश्यक पर्नेछ । यूईएफए र कोन्काकाफका सदस्यहरूको कुल मत सङ्ख्या ९६ छ ।
फिफाले आज विज्ञप्ति निकालेर परामर्श प्रक्रिया ‘गलत सञ्चारमाध्यमका समाचारहरूका कारण अवरुद्ध भएको’ दाबी गरेको छ ।
‘सार्वजनिकरूपमा व्यक्त गरिएका सुझाव र चासोको हामी सम्मान गर्छाैँ तथा खुला र लोकतान्त्रिक परामर्शप्रतिको आफ्नो प्रतिबद्धता पुनः दोहोर्याउँछौँ । प्रत्येक सदस्य संस्थाले तथ्यका आधारमा आफ्नो मत व्यक्त गर्न सक्ने सुनिश्चित गर्न हामी यो परामर्श प्रक्रिया अघि बढाउनेछौँ । कसैले पनि फुटबल बेचिरहेको छैन’, विज्ञप्तिमा उल्लेख छ ।
फिफाले विश्वकपलगायतका आफ्ना मुख्य प्रतियोगिताहरू सञ्चालन गर्न एउटा व्यावसायिक सहायक कम्पनी स्थापना गर्न प्रस्ताव गरेको छ र बाह्य लगानीकर्ताहरूले यसमा हिस्सेदारी खरिद गर्न सक्नेछन् ।
