रत्ननगर, ३१ असार ।
नेपाल पत्रकार महासंघ बागमती प्रदेश समितिले सञ्चार रजिस्ट्रारको कार्यालयमा दर्ता भएका ३२७ अनलाइन सञ्चार माध्यम र त्यहाँ कार्यरत पत्रकारहरूको प्रेस पास नवीकरण रोकिएकोप्रति गम्भीर ध्यानाकर्षण गराउँदै बागमती प्रदेशका आन्तरिक मामिला तथा कानुनमन्त्री शिवराज अधिकारीलाई ध्यानाकर्षण पत्र बुझाएको छ।
नयाँ आर्थिक वर्ष २०८३/८४ सुरु हुन लाग्दा समेत संघीय सरकारले छापाखाना र प्रकाशन नियमावली संशोधन गरी अनलाइन दर्ता अनिवार्य गरे पनि प्रदेशमा दर्ता भइसकेका मिडियाको नवीकरणबारे स्पष्ट व्यवस्था नगरेको र दुई सरकारबीचको कानुनी अन्योलताका कारण नवीकरण कार्य रोकिनु दुःखद भएको महासंघको ठहर छ।
नेपालको संविधान र कार्यविस्तृतीकरण प्रतिवेदनअनुसार अनलाइन सञ्चार माध्यमको दर्ता, नवीकरण र अनुगमनको अधिकार प्रदेशको एकल अधिकार सूचीमा रहेको तथा ‘सञ्चार माध्यम व्यवस्थापन ऐन २०७५’ बमोजिम दर्ता भई सञ्चालनमा रहेका मिडियालाई संघ, प्रदेश र स्थानीय तह (समन्वय तथा अन्तरसम्बन्ध) ऐन २०७७ को दफा ११ बमोजिम समन्वय नगरी प्रभावित बनाइएको भन्दै महासंघले सञ्चार माध्यम र पत्रकारहरूलाई मर्कामा नपारी तत्काल नवीकरणको वातावरण निर्माण गर्न जोडदार माग गरेको छ।
"हामी सबैको एउटै आवाज"
