काठमाडौँ । निर्वाचनको पछिल्लो परिणामसँगै नेकपा एमालेका प्रभावशाली नेता सुरेन्द्र पाण्डेले गम्भीर आत्मसमीक्षाको प्रस्ताव अघि सारेका छन्। सामाजिक सञ्जाल फेसबुकमार्फत आफ्नो धारणा सार्वजनिक गर्दै पाण्डेले अब कसैलाई दोष थोपरेर उम्किने ठाउँ नरहेको स्पष्ट पारेका हुन्।
निर्वाचनको नतिजाले एमालेलाई गम्भीर रूपमा सोच्न बाध्य बनाएको उल्लेख गर्दै उनले जनताले दिएको सन्देशलाई हल्का रूपमा नलिन नेतृत्वलाई चेतावनी समेत दिएका छन्। एमालेले अब आफ्नो सांगठनिक संरचना, कार्यशैली र नेतृत्वको अभ्यासमै आमूल र ठोस सुधार गर्नुपर्ने बेला आइसकेको उनको ठम्याइ छ।
पाण्डेले पार्टीका कार्यकर्ताहरूलाई निराश नहुन आग्रह गर्दै जनविश्वास गुम्नुको कारणलाई इमानदारीपूर्वक स्वीकार गर्नुपर्नेमा जोड दिएका छन्। आफ्ना गल्तीहरू सच्याउने साहस देखाउन सके र नेतृत्वको पुरानो शैलीमा परिवर्तन ल्याउन सके मात्र जनताको भरोसा फेरि जित्न सकिने उनले बताएका छन् ।
उनले संगठन अघि बढाउनका लागि विगतका कमजोरीबाट पाठ सिक्नुको विकल्प नरहेको जिकिर गरे। कार्यपद्धतिमा सुधार नआएसम्म पार्टीले पुरानो शाख फर्काउन नसक्ने संकेत गर्दै उनले अबको बाटो आत्म–आलोचना र सुधारकै हुनुपर्ने बताएका छन् ।
पार्टीको हार र आन्तरिक अवस्थाप्रति निर्मम समीक्षा गरिरहँदा पाण्डेले चुनावी मैदानमा उत्रिएका प्रतिस्पर्धी शक्तिहरूलाई पनि सम्झन बिर्सेका छैनन् । उनले निर्वाचनमा शानदार नतिजा निकालेको राष्ट्रिय स्वतन्त्र पार्टी (रास्वपा) र विजयी भएका सम्पूर्ण उम्मेदवारहरूलाई हार्दिक बधाई दिँदै लोकतान्त्रिक अभ्यासको सम्मान गरेका छन् ।
